سەرۆک وەزیرانی تورکیا لە وتارێکیدا کە لەبەردەم بەرپرسە باڵاکانی پارتەکەی پێشکەشیکرد رایگەیاند "لەكاتی بەستنی كۆنگرەی ئاكپارتی دەستلەکار دەکێشمەوە".

ئەحمەد داودئۆغڵو، سەرۆکوەزیرانی تورکیا كە هاوكات سەرۆكی ئاكپارتییە، لەبارەی دۆخی سیاسی تورکیا و حکومەت و دۆخی نێوخۆی ئاکپارتی کۆنگرەیەکی رۆژنامەوانی ئەنجامدا و تێدا رایگەیاند، "دوای ئەوەی لەسەردەمی سەرۆکایەتی ئەردۆغان وەک سەرۆکوەزیران دەستبەکاربووم، هەوڵەکانم لە حکومەت لەپێناوی ئەوەدابوو کە دۆخی ئەمن، سیاسیی و سەقامگیریی بۆ تورکیا پەرەپێبدەین. کارمان بۆ ئەوە کردووە کە بەهەموو شێوەیەک سەقامگیریی و ئەمنییەت بۆ تورکیا بپارێزین".

وتیشی "دەبێت دووبارە هەڵسەنگاندن بۆ ئاکپارتی بکەینەوە و ئۆرگانەکانی لەسەرجەم تورکیادا رێکبخەینەوە بۆ ئەوەی جارێکی دیکە ئاکپارتی بەهێز و توانایەکی باشترەوە بێتە مەیدان و کاری سیاسیی و مەدەنیانەی خۆی ئەنجامبدات، لەگەڵ ئەوەشدا لەماوەی رابروودا بەڵینەکانی کاتی هەلبژاردنمان بردووەتە سەر و جێبەجێمان کردوون کە لەکاتی هەڵبژاردندا رامانگەیاندبوو، لەگەل ئەوەشدا هەندێک لایەن بە ئامانج و مەبەست دژایەتی ئاکپارتیان کردووە".

ئەحمەد داودئۆغڵو، ئاماژەی بەوەشکرد، هەرگیز خوازیاری وەرگرتنی پۆست و پایە نەبووە  و ناشبێت، بۆیە بڕیاریداوە لەکاتنی بەستنی کۆنگرەی ئاکپارتی دەستبەرداری پۆستەكەی ببێت و خۆی بۆ پۆستی سەرۆکی ئاکپارتی نەپاڵێوێتەوە.

گوتیشی "ئاکپارتی توانای بەردەوامبوونی هەیە و  دەتوانێت کارەکانی ئەنجامبدات و هیوادارم لێکترازان لەناو ئاکپارتیدا روونەدات، من لە کاتی پۆستی وەزیری دەرەوە و سەرۆکوەزیرانیشدا هەمیشە بەو ئامانجە کارمکردووە کە خڵکی تورکیا سەربەرزانە دەرکەون و رووی تورکیام بەجوانی هێشتووەتەوە".