سەفین دزەیی وتەبێژی حکومەتیی هەرێم ڕایگەیاند تا بەر لە جەژن مووچەی مانگی ئایاری سەرجەم وەزارەتەکان دابەشدەکرێت.

دوای كۆتایی هاتنی كۆبوونەوەی ئەمڕۆ 2016/6/9ی ئەنجومەنی وەزیران سەفین دزەیی وتەبێژی رەسمی حكومەتی هەرێم لەكۆنگرەیەكی رۆژنامەوانیدا رایگەیاند: لەئێستادا كە نرخی بەرمیلێك نەوت گەیشتوەتە 50 دۆلار نەوتی هەرێم و عیراق كەمتر لەو نرخە دەفرۆشرێت، هەر بەرمیلێكی نزیكەی 8 بۆ 10 دۆلار كەمتر دەفرۆشرێت.

وتیشی: ئەو  پارەیەی ئێستا موچەی پێدەدرێت داهاتی نەوتی فرۆشراوی مانگ و نیوێك لەمەوبەرەو ئەو نەوتەی ئێستا دەفرۆشرێت گەڕانەوەی داهاتەكەی زیاتر لەمانگێكی تریش پێدەچێت و تا داهاتەكەش زیاتر بێت بەپێی نرخی رۆژ مامەڵەی لەگەڵ دەكرێت.

بەپێی قسەكانی سەفین دزەیی لەئێستادا هەر بەرمیلێك نەوتی هەرێم سەرو 43 دۆلار دەكات و رۆژانەش تەنها لەڕێی بۆرییەوە زیاتر لە 500 هەزار بەرمیل دەفرۆشرێت.