نەوشیروان مستەفا لە میانی کۆبوونەوەی خۆیدا لەگەڵ فوئاد حسێن، نوێنەری بارزانیدا، پێشنیازێکی بارزانی ڕەتکردووەتەوە سەبارەت بە چوونی نەوشیروان مستەفا بۆ بەغدا بۆ گفتوگۆکردن لەسەر پرسی سەربەخۆی و وتویەتی " ئەگەر بارزانى پرسەکەى ئەوەندە بە لاوە گرنگە ئەى بۆ خۆى سەردانى بەغدا ناکات و گفتوگۆ و دانوستان لەگەڵ بەرپرسانى عێراقدا بکات."

بە گوێرەی هەواڵێکی ماڵپەڕی ئێن ئاڕ تی " ، فوئاد حسێن سەرۆکى دیوانى سەرۆکایەتى هەرێم لە سەردانەکانیدا بۆ لای نەوشیروان مستەفا رێکخەرى گشتى بزوتنەوەى گۆڕان رایگەیاندووە، بارزانى دەیەوێت نەوشیروان مستەفا سەرۆکایەتى وەفدێک بکات و سەردانى بەغدا بکەن بۆ گفتوگۆکردن لەسەر پرسی سەربەخۆیى، چونکە ئەوە پرسێکی گرنگە و نەوشیروان مستەفاش شارەزاییەکى باش و پێشینەی لەو بابەتەدا هەیە.نەوشیروان مستەفا لە وەڵامدا بە فوئاد حسێنى وتووە، ئەگەر بارزانى پرسەکەى ئەوەندە بە لاوە گرنگە ئەى بۆ خۆى سەردانى بەغدا ناکات و گفتوگۆ و دانوستان لەگەڵ بەرپرسانى عێراقدا بکات".

لە ماوەی ڕابردوودا فوئاد حسێن دووجار سەردانى سلێمانى کرد و لەگەڵ نەوشیروان مستەفا و بەرپرسانى یەکێتیدا کۆبووەوە و بڕیاریشە جارێکی دیکە سەردانی سلێمانی بکاتەوە، بەڵام بە گوێرەی زانیارییەکان ئەگەر هەیە بزووتنەوەی گۆڕان ڕازی نەبێت بە دیدارەکە.