هۆشیار عەبدوڵا ئەندامی ئەنجومەنی نوێنەرانی عێراق ئەمڕۆ یەکشەممە لە دیوانی ئەنجومەن لە شاری سلێمانی لەگەڵ سەرۆکایەتی ئەنجومەنی پارێزگای سلێمانی کۆبۆوە و داوایکرد کە ئەنجومەنی پارێزگا وەک یەکەیەکی مەعنەوی و پەرلەمانی پارێزگاکە لەسەر موچەی پاشەکەوت و موچە فەوتاوەکانی فەرمانبەران لە مەحکەمەی ئیتحادی عێراق سکاڵا لەسەر کابینەی هەشتی حکومەتی هەرێم تۆمار بکەن .

 هۆشیار عەبدوڵا وتی : ئامانجی ئەو داوایەم ئەوەیە کە ئەو موچە فەوتاوانە بە شێوەیەکی قانونی بکرێنە ماڵ لەسەر حکومەت و وەک مافێکی فەرمانبەرانیش نەفەوتێت ، نەک بۆ ئەم کابینەیە بەڵکو مافێک بێت لە ئایندەی دور و نزیکدا بدرێتەوە بۆ ئەوەش تەنها وەعد و بەڵێنی بەرپرسانی ئێستای حکومەتی هەرێم بەس نیە بەڵکو دۆکۆمێنتی یاسایی و بڕیاری دادگای پێویستە .

ئەو پەرلەمانتارەی گۆڕان ئەوەشی وت ، داواکەی بەفەرمی ئاراستەی سەرۆکایەتی کردوە و ئەوانیش بە بایەخەوە لێیان ڕوانیوە و بەڵێنی ئەوەیان داوە لە ئەنجومەن تاوتوێیی بکەن بە جدی مامەڵەی لەگەڵدا بکەن .

هۆشیار عەبدوڵا وتی: لە پێناو پاراستنی ئەو مافەی فەرمانبەران هەمان داوام لە ئەنجومەنی پارێزگای هەولێر و دهۆکیش هەیە و بۆ پارێزگای هەڵەبجەش لەبەر نەبونی ئەنجومەن تا ئێستا ئەنجومەنی سلێمانی نوێنەرایەتیان بکەن بۆ ئەو داوایە .

تەوەرێکی تری کۆبونەوەکە تایبەت بوە بە مامەڵەی ڕاستەوخۆی حکومەتی ئیتحادی لەگەڵ حکومەتی شارەکان و لەو ڕوەشەوە ئەو پەرلەمانتارە پێشنیاری کردوە ئەو پرسە ببێتە باسێکی جدی ئەنجومەن و لە ئێستاوە گفتوگۆی لەبارەوە بکرێت ، چونکە ئەوان هەموو هەوڵێک ئەدەن لە موازەنەی ۲۰۱۷ دا جێگیری بکەن.

هۆشیار عەبدوڵا وتی ؛ پرسی چارەسەری کێشەی موچە تەنها بە پەرلەمانتارانی بەغداد ناکرێت و پەرلەمانتارانی کوردستان دەتوانن ڕۆڵی گرنگ ببین و لە ئێستاشدا ئەنجومەنی پاریزگا و ئەندامەکانی زۆرترین ئەرک و بەرپرسیارێتیان ئەکەوێتە ئەستۆ کە لە پێناوی چارەسەری موچە و ژیانی خەڵک بڕیاری گرنگ و مێژویی و یەکلا کەرەوە بدەن.