وەزارەتی گواستنەوە و گەیاندنی هەرێم ڕایگەیاند کە دەبێت
هەموو تاکسییەک ئاڕم و لۆگۆی هەبێت تەندەرێکیش بۆ ئەو پرۆژەیە ئامادەدەکەن.
وەزارەتی گواستنەوە و گەیاندن لە ڕاگەیەندراوێکدا ئاشکرایانکردووە
" پرۆژەی ئاڕم و لۆگۆو كارتی ئۆتۆمبێلی کرێ كە ماوەیەكی زۆرە كاری لەسەر
دەكەین بۆ پارێزگاكانی هەولێرو سلێمانی و دهۆك دەخەینەڕوو ، بەڵام بەهۆی ئەوەی
پارێزگای هەڵەبجە تابلۆی ئۆتۆمبێلی بۆ دیاری نەكراوە لەلایەن وەزارەتی ناوخۆوە،
بۆیە ئۆتۆمبێلەکانی پارێزگای هەڵەبجەو هەردوو ئیدارەی گەرمیان و ڕاپەڕین هەڵگری
هەمان لۆگۆ و ئاڕمی پارێزگای سلێمانی دەبن".
لە ڕاگەیەندراوەکەدا هاتووە "لەگەڵ بەڕێوبەرانی
گشتی گواستنەوەی هەرێم گفتوگۆو ڕێگاكان خرایەڕوو، لە ئێستادا تەندەرین بۆ پرۆژەكە
ئامادەكراوە و نوێنەرەكانیش بۆ جێبەجێكردنی لێژنەی تەندەرەكە دیاریكراون و تەنها
ئەوە ماوەتەوە دەستبەكاربونی تەندەرەكان ڕابگەیەندرێت".
مەولود باوەمورد وەزیری گواستنەوە لەو ڕاگەیەندراوەدا
وتوویەتی "بە بڕیارێكی تایبەتی ئەنجوومەنی وەزارەت بڕیارمان داوە كە
بەڕێوبەرایەتی گشتی گواستنەوە خۆی تەندەرەكە جێ بەجێ بكات و بیخاتەڕوو، پلانی
ئامادەکاری رێکخستنی کارکردنی تاکسی لە هەرێمی کوردستان لەلایەن وەزارەتی
گواستنەوە و گەیاندن بۆ کارکردنی تاکسیەکانی ناوخۆی شارەکان و هێڵەکانی دەرەوەو
دیاریکردنی سیستەمی لۆگۆو کۆد دەبێت لەپێناو ئەوەی چیتر بە هەڕەمەکیانە کارنەکرێت
و کاری هاووڵاتیان خێراتر بڕوات بەڕێوە".