هۆشیار عەبدوڵا، ئەندامی پەرلەمانی عێراق دەڵێت لە هەرێمی کوردستان پارە بۆ هەمووشتێک هەیە مووچەی فەرمانەبەران نەبێت.

لە پێگەی تایبەتی خۆی لە تۆڕی کۆمەڵایەتی فەیسبووک، هۆشیار عەبدوڵا نوسیویەتی "لە هەرێمی کوردستان ، پارە بۆ ئەنجامدانی هەڵبژاردنی پەرلەمان و سەرۆکایەتی هەیە ، پارە بۆ سەفەرە زۆرەکانی بەرپرسان هەیە ، بۆمیدیای سێبەر هەیە ، بۆ میدیای حزب هەیە ، بۆ سیمینار و کۆڕ و دیدارەکان هەیە ، پارە هەیە بۆ ئەوەی حزب ، رێکخراوەکان و سایت وپێگە ئیعلامیەکان ، کونتڕۆل بکات و بیانکاتە هی خۆی ، پارە هەیە بۆ موناسەبەکانیان ، میوان لەو ئەوسەر و ئەوپەڕی دونیاوە بانگهێشت بکەن ، پارە بۆ هەمو ئەوانە هەیە بەڵام بۆ موچەی خەڵک نیە".
هەروەها دەڵێت "لە سەرەتای کێشەی موچە بە توندترین شێوە وەڵامدراینەوە کاتێک وتمان نەمانی موچە هۆکارەکەی نەبونی پارە نیە بەڵکو دزی و فەساد و جەردەییە ، هیوادارم ئێستا لای هەموان ڕون بێت کە پارەی نەوت و داهاتی ناوخۆ و باجی سەر هاوڵاتیان کە ڕۆژانە بە پاساوی نوێ زیاد ئەکرێ ، نادرێ بە خەڵک و لە چاو گرنگی موچە و ژیانی هاوڵاتیان ، ئەدرێ بە شتی ڕوکەش و پڕوپوچ کە هیچی ناکاتە پارەی قوتویەک شیر بۆ مناڵی فەرمانبەرێکی بێموچە ، یان پارەی عیلاجی نەخۆشێک کە پارەی نیە بڕواتە عیادەیەک بۆ وەرگرتنی چارەسەر".

نوسیویەتی "هەموو کەون بگەڕێیت ، چینێکی دەسەڵاتدار نابینی وەک ئەوەی هەرێمی کوردستان بێچاوڕو و بێشەرم ، هێشتا ڕویان هەیە لەدیدار و کۆڕەکاندا قسەی زل زل بکەن ؟!"