سەرۆکی پەرلەمانی کوردستان لە کۆبوونەوەیەک لەگەڵ هاوسەرۆکی کۆنگرەیی نەتەوەیی کوردستان رایگەیاند" ئەگەر وریا نەبین دەبینە بەشێک لە ململانێ خوێناوییەکانی ناوچەکە".
لەکۆبونەوەی نێوان سەرۆکی پەرلەمانی کوردستان و هاوسەرۆکی کۆنگرەی نەتەوەیی کوردستان، پرسی بەستنی کۆنگرەی ڕاوێژکاریی نەتەوەیی بۆ حیزبەکانی هەر چوار پارچەی کوردستان، گفتوگۆی لەسەرکرا و سەرۆکی پەرلەمان پشتیوانی پەرلەمانی کوردستانی بۆ سەرکەوتنی کۆنگرەکە دەربڕی.
ئەمڕۆ، ٢ شەممە، ٣-٧ کەمالی تاهیر زادە، هاوسەرۆکی کۆنگرەی نەتەوەیی کورد و شاندێکی کۆنگرەی نەتەوەیی، سەردانی سەرۆکی پەرلەمانی کوردستانیان کرد و لە کۆبونەوەیەکدا کە نوێنەری فراکسیۆنەکانی(یەکێتی و گۆڕان و کۆمەڵ و یەکگرتوو) ئامادەبوون، پرسی بەستنی کۆنگرەیەکی ڕاوێژکاریی نەتەوەیی گفتوگۆی لەسەرکرا، کە بڕیارە ناوەڕاستی ئەم مانگە بۆ نزیکەی ١٠٠ حیزب و ڕێکخراوی سیاسی هەرچوار پارچەی کوردستان لە سلێمانی ساز بکرێت.
سەرۆکی پەرلەمان، وێڕای پشتیوانی لەسەرکەوتنی کۆنگرە ڕاوێژکارییەکە، ئاماژەی بەوەدا، کە ململانێی نێودەوڵەتی و هەرێمایەتی لەناوچەکەماندا لەوپەڕی توندیدایە، بەڵام ئەگەر وریا نەبین دەبینە بەشێک لە ململانێ خوێناوییەکانی ناوچەکە. لەبەشێکی تری وتەکانیدا سەرۆکی پەرلەمان وتی" ڕوداوەکانی ناوچەکە و پێشهاتەکان وامان لێدەخوازێت تەبا بین و بەرامبەر پرسە نەتەوەییەکان بەرژەوەندی گەلی کورد، لە پێش بەرژەوەندیی حیزبییەوە دانێین.