بەرپرسێكی باڵای یەكگرتووی ئیسلامی لە زاری نێچیرڤان بارزانییەوە ئاشکرای دەکات حكومەت راپۆرتێكی لەبارەی سیستمی نوێی موچە ئامادەكردووەو دەیدات بەبانكی نێودەوڵەتی بۆئەوەی رەزامەندی لەسەر ئەو رێژەیە بدات كە دیاریكراوەو نزیكەی (70%)ی موچەیە.

هەفتەی رابردوو، نێچیرڤان بارزانی سەرۆكی حكومەتی هەرێم و وەفدێكی هاوڕێی سەردانی سەڵاحەدین محەمەد بەهادین ئەمینداری گشتی یەكگرتووی ئیسلامی کردووە و بە وتەی د.عومەر محەمەد ئەندامی ئەنجومەنی جێبەجێكردنی یەكگرتوو "سەرۆكی حكومەت ئاماژەی بەڕاپۆرتێك كرد كە بەنیازن بیدەن بەبانكی نێودەوڵەتی بۆئەوەی ئەو رێژەیەی دانراوە بۆ سیستمی نوێی موچە كە نزیكەی (70%)ی موچەیە، لەلایەن بانكی نێودەوڵەتییەوە پەسەند بكرێت".

ناوبراو بە تۆڕی هەواڵی سلێمانی وتووە، "راپۆرتەكە لەكۆمەڵێك داتاو زانیاری پێكهاتووەو لەلایەن وەزارەتی پلاندانان و داراییەوە ئامادەكراوەو وەزیرەكان ئاگادارن، پێشكەشی بانكی نێودەوڵەتی دەكرێت، ئەوانیش لەسەر بنەمای داهاتی هەرێم و خەرجییەكان و ژیانێكی شەرەفمەندانە، بڕیار لەسەر رێژەی موچەی فەرمانبەران دەدەن".

ڕوونیشی کردووەتەوە "سیستەمی نوێی موچە جیاوازە لەسیستمی موچەی لەعیراق و پێویستە لەلایەن بانكی نێودەوڵەتییەوە رەزامەندی لەسەر بدرێت، پاشان دەخرێتە بواری جێبەجێكردنەوە".