پاش تەقینەوەكەی شەوی ڕابردووی گەڕەكی (عەدەن)ی
شاری كەركوك، ئاسایشی پارتی لەو شارە ڕایدەگەیەنێت تیرۆریستان دەیانەوێت بە هەر نرخێك
بێت، دۆخی ئەمنیی شارەكە تێك بدەن و هاوڵاتیان بەشداری لە پرۆسەی ڕیفراندۆمی سەربەخۆییدا
نەكەن.
بەپێی ڕاگەیەندراوێكی بەڕێوەبەرایەتی ئاسایشی كەركوك
(پارتی)، "شەوی ڕابردوو 16/9/2017 دوژمنانی كورد و ڕیفراندۆم، كردەوەیەكی تیرۆریستییان
لە گەڕەكی (عەدەن)ی شاری كەركووك ئەنجام دا و بەهۆیەوە 3 هاووڵاتی شەهید بوون و 10
هاووڵاتی دیكەش بریندار بوون."
بەپێی ڕاگەیەندراوەكە "تیرۆریستان و دوژمنانی
سەقامگیریی كەركووك هەرگیز چاویان بە دۆخی هێمن و ئارامی ئەم شارە هەڵنایەت کە لە سایەی
هێزەكانی پێشمەرگە و ئاسایش و دەزگا ئەمنییەكانەوە هاتووەتە دی، بۆیە دەیانەوێت بە
هەر نرخێك بێت، دۆحی ئەمنیی تێك بدەن و ترس و دڵەڕاوكێ بخەنە دڵی هاونیشتمانییانەوە".
لە ڕاگەیەندراوەكەدا ئاماژە بەوە دراوە "تیرۆریستان
دەیانەوێ بەمكارانە وا بكەن هاووڵاتیان بەشداریی پرسی ڕیفراندۆمی سەربەخۆیی كوردستان
نەكەن، بەڵام خەڵكی كەركووك هەموو كات ڕووبەڕووی دوژمنان بووەتەوە و لەوپێناوەشدا قوربانیی
داوە و هەموو دۆخە هەستیار و دژوارەكانی تێپەڕاندووە".