بەهۆی ئەنجامدانی ریفراندۆم لە باشووری کوردستان، تورکیا پەخشی کەناڵی رووداوی لە مانگی دەستکردی تورکسات و کوردستان ٢٤ و وار تیڤی راگرت، هەر ئەمڕۆ نووسینگەی کەناڵ ٢٤ یش لە تاران داخرا.
وەک میدیای رووداو بڵاویکردۆتەوە "دەستەی باڵای رادیۆ و تەلەڤزیۆنەکانی تورکیا (ریتوک) بڕیاری دا پەخشی رووداو لە مانگی دەستکردی تورکسات رابگرێت".
ئەو میدیایە بڵاویکردەوە "رۆژی 25-9-2017 دەستەی باڵای رادیۆ و تەلەڤزیۆنەکانی تورکیا (ریتوک) بە ئامادەبوونی نوێنەرانی ئاکەپە و مەهەپە کۆبووەوە، لە کۆبوونەەکەدا بڕیاردرا پەخشی رووداو لەسەر مانگی دەستکردی تورکسات رابگیرێت".
هەروەها ئاماژە بۆ ئەوە کراوە کە ئەمڕۆ چوارشەممە 27-9-2017 کاژێر 5:50 خولەک ئەم بڕیارە لەلایەن تورکساتەوە جێبەجێکراو پەخشی تەلەفزیۆنی رووداو لەگەڵ هەردوو کەناڵی کوردستان 24 و وارتیڤی لەسەر ئەو مانگە دەستکردە راگیرا.
راگرتنی پەخشی ئەو سێ کەناڵە و داخستنی نووسینگەی یەکێکیان لە تورکیا دوای ئەنجامدانی ریفراندۆم دێت لە باشووری کوردستان.