ئه‌مڕۆ 25-11 سه‌رۆك كۆماری عیراق له‌ رێگه‌ی فڕۆكه‌خانه‌ی نێوده‌وڵه‌تی سلێمانییه‌وه‌ گه‌یشته‌ شاری سلێمانی و له‌لایه‌ن شانده‌ حزبی و حكومییه‌كانه‌وه‌ پێشوازی لێكرا.

له‌وباره‌یه‌وه‌ فوئاد مه‌عسوم سه‌رۆك كۆماری عیراق بۆ كه‌ناڵی ره‌سمی یه‌كێتی رایگه‌یاند، هاتۆته‌ سلێمانی و دواتر سه‌ردانی شاره‌كانی تریش ده‌كات، له‌ سه‌ردانه‌كه‌شدا سێ پرسی سه‌ره‌كی هه‌ن، كه‌ گفتوگۆی جدی له‌باره‌وه‌ ده‌كات.

به‌وته‌ی سه‌رۆك كۆمار، پرسی یه‌كه‌م دۆخی ناوخۆیی یه‌كێتیی نیشتمانیی كوردستان و ئه‌و كێشانه‌یه‌ كه‌ روبه‌ڕوی بۆته‌وه‌. هه‌روه‌ها پرسی دووه‌م مه‌سه‌له‌ی كه‌ركوك و چاره‌سه‌ركردنێتی، پرسی سێیه‌میش كێشه‌كانی نێوان به‌غدا و هه‌رێمی كوردستانه‌.

وتیشی "هه‌ر كامێك له‌و پرسانه‌ ته‌ماشا بكه‌ی بابه‌تی یه‌كه‌مه‌، به‌ڵام سه‌رجه‌میان په‌یوه‌ندیان به‌یه‌كه‌وه‌ هه‌یه‌و ئومێده‌وارین به‌ هاوكاری سه‌رجه‌م لایه‌نه‌كان كێشه‌كان چاره‌سه‌ر بكه‌ین. هه‌ربۆیه‌ هه‌وڵ و ده‌سه‌ڵاته‌كانی خۆم بۆ چاره‌سه‌ركردنی كێشه‌كان به‌كارده‌هێنم، له‌ئێستاشدا بارودۆخ به‌ره‌و باشتر ده‌ڕوات".