رەشنوسی بودجەی فیدڕاڵی ساڵی 2018ـی عێراق
جارێکی تر رەوانەی پەرلەمان کرایەوەو پشکی هەرێمی کوردستانیش تێدا زیادنەکرا و لە
12.67% وەک خۆی ماوەتەوە.
ماجیدە تەمیمی، ئەندامی لیژنەی دارایی پەرلەمانی
عێراق لە راگەیەنراوێکدا ئاشکرایکرد، رەشنووسی پڕۆژەیاسای بودجەی فیدراڵی ساڵی
2018 ـی عێراق گەیشتووەتە پەرلەمان و بڕیارە شەممەی داهاتوو لە کۆبوونەوەیەکی نائاسایی
پەرلەمان خوێندنەوەی یەکەم بۆ پڕۆژەیاساکە ئەنجامبدات.
ئەو پەرلەمانتارەی لیژنەی دارایی ئاماژەی بەوەشکردووە،
حکومەتی عێراق بڕی لە 3.8% مووچەی فەرمانبەران دەبڕێت و نرخی هەر بەرمیلێک نەوتیش بە
46 دۆلار خەمڵێندراوە
.
ماجیدە تەمیمی گوتیشی: "بەپێی رەشنووسەکە
پشکی هەرێمی کوردستان لە بودجەی ساڵی 2018 ـی 12.67% دەبێت". ئەوەش لەکاتێکدا
پێشتر پشکی هەرێمی کوردستان لە بودجەی فیدراڵی لە 17% بوو
.
لەماوەی رابردوودا، حکومەتی هەرێمی کوردستان
و فراکسیۆنە کوردستانییەکان ناڕەزایی زۆریان بەرامبەر کەمکردنەوەی پشکی کوردستان لە
بودجەی فیدراڵی عێراق دەربڕی.