حکومەتی تورکیا ڕازی بووە بە ماوەی پێنج ساڵ قەرزەکانی حکومەتی هەرێم وەربگرێتەوە، هەرێمیش مانگانە 25 ملیۆ دۆلار دەداتەوە.
دكتۆر عیزەت سابیر سەرۆكی لیژنەی دارایی پەرلەمانی كوردستان لە لێدوانێکی رۆژنامەوانیدا، ڕایگەیاند " توركیا ڕازی بووە بە ماوەی 5 ساڵ قەرزەكانی سەر حكومەتی هەرێمی كوردستان وەربگرێتەوە".
ئەو پەرلەمانتارە لە درێژەی لیدوانەکەیدا وتیشی " كۆی قەرزەكانی توركیا لەسەر هەرێمی كوردستان 2 ملیار دۆلارە، بەپێی ئەو بەرنامەیەی حكومەتی هەرێمیش ئامادەی كردووە، مانگانە 25 ملیۆن دۆلاری دەداتەوە، بۆ ئەوەش پێویستی بە 5 ساڵ هەیە".
د. عێزەت سابیر سەرۆكی لیژنەی دارایی پەرلەمان وتیشی " ئەوەندەی ئێمە ئاگادارین، حكومەتی هەرێمی كوردستان 6 ملیار دۆلاری مووچەخۆرانی هەرێمو ملیارێكو 500 ملیۆن دۆلاری كۆمپانیای (ڕوسنەفت)یش قەرزارە، بەڵام شێوازی دانەوەی ئەو دوو قەرزەیان بەئێمە نەوتووە".