پێش نیوەرۆی ئەمرۆ شەممە، وەفدی باڵای حكومەتی هەرێم لەگەڵ سەرۆك كۆماری ئێران و سكرتێری ئەنجومەنی باڵای ئاسایشی ئێران كۆبونەوە و بەرپرسانی ئێران پێشوازی لە هەڵوێستی نوێی حكەومەتی هەرێم دەكەن
میدیا ئێرانییەكان بڵاویانكردەوە لەیەكەم چالاكی سەردانەكەیاندا وەفدی هەرێمی كوردستان لەگەڵ هەریەك لە حەسەن رۆحانی سەرۆك كۆماری ئێران و شەمخانی سكرتێری ئەنجومەنی باڵای ئاسایشی ئێران كۆبونەتەوە.
عەلی شەمخانی لەبارەی كۆبونەوەكەی لەگەڵ بەرپرسانی باڵای هەرێم ڕایگەیاندووە "هەرێمی كوردستان سیاسەتێكی نوێی دەستپێكردووەو پێشوازی لێدەكەین".
وەفدی هەرێم دوو رۆژ لەئێران دەمێننەوە و چەندین كۆبونەوەی تر لەگەڵ عەلی لاریجانی سەرۆكی پەرلەمانی ئێران و بەشێكی تر لە گەورە بەرپرسانی ئەو ووڵاتە ئەنجام دەدەن.
فوئاد حوسێن، سەرۆكی دیوانی سەرۆكایەتیی هەرێمی كوردستان و سەفین دزەیی، وتەبێژی حكومەت یاوەری نێچیرڤان بارزانی و قوباد تاڵەبانی دەكەن.
سەردانی ئەمجارەی هەریەك لەنیچیرڤان بارزانی و قوباد تاڵەبانی بۆ ئێران دوای هەنگاوەكانی ئەو دوو كەسایەتییە باڵایەی حكومەتی هەرێمی كوردستان بۆ چاككردنەوەی پەیوەندییەكانی نێوان هەرێم و وڵاتانی دەرەوە دێت، كە لەدوای ریفراندۆم رووبەروی ئاڵۆزی ناوخۆیی و ئیقلیمی و جیهانی بۆتەوە.
دوێنێ حەیدەر عەبادی سەرۆك وەزیرانی عێراق، پێشوازی كرد لە نیچیرڤان بارزانی و قوباد تاڵەبانی، دواتریش لەسەر كۆبونەوەكە نوسینگەی عەبادی ڕاگەیاندراوێكی بڵاوكردەوە.
بەگوێرەی ڕاگەیەندراوی كۆبونەوەكە عەبادی لەكۆبونەوەكەدا داوای كردووە كە بەنزیكترین كات دەسەڵاتی خاڵە سنورییەكان و فرۆكەخانەكان بدەنەوە بە دەسەڵاتی حكومەتی ناوەندی و هەروەها داوای كردووە ئەو نەوتەی لەهەرێمی كوردستان دەردەهێنرێت ڕادەستی حكومەتی عێراقی بكرێت و تەنها لەرێگەی كۆمپانیایی سۆمۆوە هەناردە بكرێت.
سەبارەت بەمووچەی فەرمانبەرانی هەرێمی كوردستان عەبادی بە پێویستی زانیوە لیژنەكان كارەكانیا تەواو بكەن بۆ ئەوەی مووچەی فەرمانبەرانی هەرێمی كوردستان بنێردرێت و جەختیشی لەسەر پەلەكردن لەو پرسەدا كردووەتەوە.