یه‌كێتیی نیشتمانیی كوردستان په‌یامێكی ئاڕاسته‌ی مه‌رجه‌عی باڵای شیعه له عیراق كردو تێیدا داوای چاره‌سه‌ری دۆخی عیراق ده‌كات.
ماڵپه‌ڕی فەرمی یه‌كێتی نیشتمانی كوردستان بڵاویكرده‌وه، كه دوانیوه‌ڕۆی ئه‌مڕۆ سێشه‌ممه 12-6-2018 په‌یامی مه‌كته‌بی سیاسی یه‌كێتیی نیشتمانیی كوردستان گه‌یه‌نرایه ئایه‌توڵا عوزما عه‌لی سیستانی مه‌رجه‌عی باڵای شیعه، كه هیممه‌ت و حیكمه‌تی خۆی بخاته‌كارو كێشه‌ی نێوان لایه‌نه شیعییه‌كان و لایه‌نه‌كانی تر به‌پێی رێسای هه‌ڵبژاردن و یاسا و ده‌ستوور به زووترین كات چاره‌سه‌ر بكات.
له په‌یامه‌كه‌ی یه‌كێتیدا بۆ ئایه‌توڵا عوزما عه‌لی سیستانیدا هاتووه، عیراق به دۆخێكی مه‌ترسیداردا تێده‌په‌ڕێت، چاره‌سه‌ركردنی كێشه سیاسییه‌كان و پێكهێنانی حكومه‌تێكی نیشتمانی ته‌وافقی فراوان، به‌رپرسیارێتی مێژوویی و نیشتمانی و سیاسی و یاسایی گه‌وره‌یه‌و رێزگرتنیشه له مافی ده‌نگده‌دران.
هه‌ر له په‌یامه‌كه‌ی یه‌كتێتیدا هاتووه، ئێمه وه‌ك هه‌میشه به‌شێك ده‌بین له چاره‌سه‌رو به یه‌كخستنی هه‌ڵوێستی هێزه كوردستانییه‌كان كاریگه‌ری زیاتری ده‌بێت بۆ چاره‌سه‌ری كێشه‌كان و دابینكردنی مافه‌كانیان له چوارچێوه‌ی عیراقی فیدراڵدا.