پۆلیسی سلێمانی ڕایگەیاند به‌مه‌به‌ستی پاراستنی زیاتری سه‌رو ماڵی هاوڵاتیان و رێگه‌گرتن له‌هه‌ر حاڵه‌تێكی بڕین و دزینی جانتای ئافره‌تان، هێزەکانی ژنانیان خستووەتە حاڵەتی ئامادە باشییەوە

به‌ڕێوه‌به‌رایه‌تی‌ پۆلیسی‌ پارێزگای‌ سلێمانی‌ رایگه‌یاند كه‌ "له‌گه‌ڵ نزیك بونه‌وه‌ی جه‌ژنی قوربانی پیرۆز به‌ڕێوه‌به‌رایه‌تی پۆلیسی پارێزگای سلێمانی، پلان و ڕێوشوێنی تایبه‌تی گرتۆته‌به‌ر له‌ ناو بازاڕو شوێنه‌ گشتیه‌كان به‌مه‌به‌ستی پاراستنی سه‌رو ماڵی هاوڵاتیان".

لەو ڕاگەیەندراوەی پۆلیسدا کە وێنەکی دەست سپی کەوتووە هاتووە "له‌گه‌ڵ نزیكبوونه‌وه‌ی جه‌ژن و قه‌ره‌باڵغبوونی زیاتری ناوبازاڕ و شوێنه‌گشتیه‌كان، به‌فه‌رمانی عه‌میدی مافپه‌روه‌ر ئاسۆ ته‌ها عبدوالكریم به‌ڕێوه‌به‌ری پۆلیسی پارێزگای سلێمانی سه‌رجه‌م به‌ش و بنكه‌كانی سه‌ر به‌ به‌ڕێوه‌به‌رایه‌تی له‌حاڵه‌تی ئاماده‌باشی زیاتردان".

ڕاشیانگەیاندووە "بۆ ئه‌و مه‌به‌سته‌ له‌ ئه‌مڕۆوه‌ سه‌رجه‌م ژنانی پۆلیس خرانه‌ حاڵه‌تی ئاماده‌باشیه‌وه‌ له‌ ناوبازاڕو شوێنه‌ گشتیه‌كان به‌مه‌به‌ستی پاراستنی زیاتری سه‌رو ماڵی هاوڵاتیان و رێگه‌گرتن له‌هه‌ر حاڵه‌تێكی بڕین و دزینی جانتای ئافره‌تان".

پۆلیس داواش له‌هاوڵاتیان ده‌كات له‌ كاتی بونی هه‌ر رووداو و حاڵه‌تێكی نه‌خوازراودا راسته‌وخۆ په‌یوه‌ندی بكه‌ن به‌ هێڵی گه‌رمی 105 به‌شی پۆلیسی نه‌هێشتنی تاوان و 104 به‌شی پۆلیسی فریاكه‌وتن.