یەكێتی و پارتی دوای كۆبوونەوەی ئەمڕۆیان ڕاگەیەنراوێكیان بڵاوكردەوە و ڕایانگەیاندووە " بانگهێشتی كۆبوونەوەیەكی هاوبەشی هەموو لایەنەكان دەكەین".
دەقی راگەیێندراوەكە ..
ڕۆژی دووشەممە ١٠ـی٩ـی٢٠١ لە سەلاحەدین، بە سەرپەرشتیی سەرۆك مەسعوود بارزانی و هەڤاڵ كۆسرەت ڕەسووڵ، هەردوو مەكتەبی سیاسیی یەكێتیی نیشتیمانیی كوردستان و پارتی دیموكراتی كوردستان كۆبوونەوە و چەند بابەتێكی گرینگیان تاوتوێ كرد و بڕیاری پێویستیان لەبارەوە وەرگیرا.
یەكەم: لە ڕوانگەی بەرژەوەندیی گەلەكەمان و هەستیاریی بارودۆخەكە، هەردوولا جەخت لەسەر یەكهەڵوێستی و پێكەوە كاركردن لە بەغداد و كوردستان دەكەنەوە و بۆ ئەم مەبەستەیش لیژنەی هاوبەش بەردەوام لە پەیوەندییدا بن و ئامادەكاریی پێویست ئەنجام بدەن.
دووەم: هەروەكوو لە ماوەی ڕابردوویش بە ئاشكرا ڕامانگەیاندووە بۆ یەكڕیزیی نێوماڵی كوردستان و بەشداریی هەموو لایەنەكانی بەشدار لە پڕۆسەی سیاسیدا، بانگهێشتی كۆبوونەوەیەكی هاوبەشی هەموو لایەنەكان دەكەین. بۆ ئەم مەبەستە لیژنەیەك ڕاسپێردرا بۆ ئامادەكردنی پێداویستییەكانی ئەو كۆبوونەوەیە.
سێیەم: لەبەرهەستیاریی بارودۆخی كەركووك و پێویستیی چارەسەر كردنی، بڕیار درا ئەو لیژنەیەی كە لە كۆبوونەوەی پێشوو پێكهێندرابوو، دەستبەكار بن بۆ دیراسە كردن و هەنگاو نان.
مەكتەبی سیاسیی
مەكتەبی سیاسیی
یەكێتیی نیشتیمانیی كوردستان
پارتی دیموكراتی كوردستان
١٠ـی٩ـی٢٠١٨