پەكەكە كوژرانی 11 سەربازی توركیای لەناوچە سنوورییەكانی باشووری كوردستان راگەیاند.
بەگوێرەی راگەیەندراوێكی هەپەگە، كە باڵی سەربازی پارتی كرێكارانی كوردستان، پەكەكەیە، لەماوەی دوو رۆژی رابردوودا، گەریلاكانی پەكەكە لە چەند چالاكییەكدا لە ناوچەی سیدەكانی باشوری كوردستان و چەند ناوچەیەكی دیكە، 11 سەربازی توركیایان كوشتووە.
ئەوەش لەكاتێكدایە سوپای توركیا هەواڵەكەی پشت راست یان رەت نەكردووەتەوە.
جەنگی سوپای توركیا و پەكەكە سنووری باكووری كوردستانی بەرەو باشوور بڕیوە، ئەمەش دوای ئەوەی هات، ئەردۆغانی سەرۆككۆماری توركیا رایگەیاند، ئەوان پەكەكە لە قەندیل دەردەكەن و "سنوورەكانیان دەپارێزن".