وتەبێژی یەکێتی نیشتیمانی کوردستان سەرجەم ئەو وەزارەتانە ئاشكرادەکات کە بەر حزبەکەی دەکەون لە کابینەی نۆیەمی حکومەتی هەرێم.
لەتیف شێخ عومەر وتەبێژی یەكێتیی نیشتمانیی كوردستان بەمیدیای فەرمی حزبەکەی راگەیاند، یەكێتی 6 وەزارەت لەم كابینەیەدا وەردەگرێت، لەگەڵ هەریەك لەپۆستی سەرۆكی پەرلەمان، جێگری سەرۆكی هەریمَ و جێگری سەرۆكی حكومەت و ژمارەیەك دەستە و بریكاری وەزارەت.
وتیشی، هێشتا هیچ ناوێك بۆ كاندیدی پۆست و وەزارەتەكان بەتەواوی یەكلا نەكراونەتەوەو ئەوەش نابێتە كۆسپ و هەركاتێك پێویست بكات یەكێتی پێشكەشی كابینەی دەكات.
لەتیف شێخ عومەر ئاماژەی بەوەشکرد، كە یەكێتی پشكی وەزارەتەكانی (پێشمەرگە، خوێندنی باڵا، كشتوكاڵ، پلاندانان، رۆشنبیری، وەزارەتێكی هەرێم) بەردەكەوێت، لەگەڵ ژمارەیەك بریكاری وەزیر و دەستە.
راشیگەیاند، كە بۆ پرسی یەكلاكردنەوەی كاندیدی پۆست و وەزارەتەكان مەكتەبی سیاسی و ئەنجومەنی سەركردایەتی كۆبوونەوە دەكات.
وتەبێژی یەكێتی باسی لەوەشکردووە، سەرباری ئیمزاكردنی رێككەوتنی یەكێتی و پارتی كۆمەڵیك وردەكاری دیكە ماون، تا ئێستا قسەمان لەسەر نەكردووە و لەكاتی پێكهێنانی حكومەتدا تاووتوێیان دەكەین.