کازم فاروق: حکومەت زیاتر لە 100 ملیار دیناری نەخۆشانی شێرپەنجەی لە بوارەکانی‌ دیکەدا بەکاریهێناوە

‌
کازم فاروق، سەرۆکی‌ فراکسیۆنی‌ نەوەی نوێ لە پەرلەمانی‌ کوردستان رایگەیاند، لەکاتی‌ قەیرانی‌ داراییدا حکومەتی‌ هەرێمی‌ کوردستان بڕی‌ 117 ملیار دیناری‌ لە سندوقی‌ هاوکاری‌ شێرپەنجە دەرهێناوە و لە بوارەکانی‌ دیکەدا بەکاریهێناوە دەشڵێت "بەهۆی‌ ئەوەوە نەخۆشەکان ناچاربوون دەرمان لە دەرەوەی‌ نەخۆشخانەکان بکڕن".

کازم فاروق، له‌ كۆنگره‌یه‌كی رۆژنامه‌وانیدا ئاماژەی بۆ ئەوەکرد دەرهێنانی‌ ئەو بڕە پارەیە لەو سندوقە، بووەتە هۆی‌ ئەوەی‌ 200 جۆری‌ دەرمان لە نەخۆشخانەکانی‌ تایبەت بە شێرپەنجە نەمێنن، بەهۆی‌ ئەوەشەوە نەخۆشەکان ناچاربوون دەرمان لە دەرەوەی‌ نەخۆشخانەکان بکڕن.

ئەوەشی خستەڕوو "لەکاتی‌ زیادبوونی‌ قەرزەکان لەسەر وەزارەتی‌ تەندروستی‌ بەشێک لە کۆمپانیاکانی‌ فرۆشتنی‌ دەرمان بڕیاریانداوە دەرمان بەو وەزارەتە نەفرۆشن، هەر بۆیە وەزارەتی‌ تەندروستی‌ ناچاربووە گرێبەستەکانی‌ لەگەڵ کۆمپانیا ژمارە دووەکان گرێبدات، ئەمەش هۆکاری‌ کەمبوونەوەی‌ چارەسەری‌ نەخۆشییەکە بووە".

سەرۆکی‌ فراکسیۆنی‌ نەوەی نوێ هەر لەو کۆنگرە ڕۆژنامەوانیەدا جەختیکردەوە "پارێزگای‌ دهۆک پێویستی‌ بە سەنتەرێکی‌ چارەسەری تایبەتبە شێرپەنجە هەیە، بە بەهای‌ 50 ملیار دینار و پرۆژەکەشی‌ ئامادەکراوە، بەڵام حکومەتی‌ هەرێم ئامادە نییە پارەی‌ خەرجکراوی‌ ئەو سندوقە بگێڕێتەوە تا بتوانرێت ئەو نەخۆشخانەیە دروستبکرێت".
 


PM:05:21:23/09/2019








ئەستێرەکان

Spee Media