سەندیكای كارمەندانی تەندروستی چوار داواكاری ئاراستەی لایەنە پەیوەندیدارەكانی هەرێمی كوردستان دەكات، دەیانەوێت ئەو كارمەندانەی بەشداری هەڵمەتی رووبەڕووبونەوەی كۆرۆنابوون بەشێوەیەكی تایبەتی پاداشت بكرێن.
لە نوسراوێكدا كە ئاراستەی هەریەكە لە سەرۆكایەتی هەرێم و حكومەت و پەرلەمانی كوردستان و لایەنە پەیوەندیدارەكان كراوە، سه‌ندیكای كارمه‌ندانی ته‌ندروستی لقی سلێمانی رایگه‌یاندووە" له وڵاتانی دراوسێ و جیهانیشدا حكومه‌ت و هاوڵاتیان به چه‌ندین شێوه پێزانین بۆ كارمه‌ندانی ته‌ندروستی و پزیشكان و فه‌رمانبه‌ران ده‌رده‌بڕن و له رووی ماددی و مه‌عنه‌وییه‌وه پاداشت ده‌كرێن".
هاوکات لە یاداشتەکەدا کارمەندانی تەندروستی داواشی له حكومه‌تی هه‌رێم و لایه‌نه په‌یوه‌ندیداره‌كان بكه‌ن كار له‌سه‌ر ئه‌م داواكارییانه بكه‌ن:
1- دابینكردنی زه‌وی بۆ به‌شداربووانی روبه‌ڕوبونه‌وه‌ی په‌تای ڤایرۆسی كۆرۆنا له‌و شوێنانه‌ی كه كاری تێدا ده‌كه‌ن.
2- پێدانی سوپاس و پێزانین و پێشخستنی ساڵی خزمه‌تیان بۆ ماوه‌ی ساڵێك.
3- دامه‌زراندنی ئه‌و خۆبه‌خشانه‌ی كه به‌بێ به‌رامبه‌ر ساڵانێكه خزمه‌ت ده‌كه‌ن و ئێستا له روبه‌ڕوبونه‌وه‌ی ڤایرۆسی كۆرۆنادا پێشه‌نگن.
4- دابینكردنی هاوكاریی دارایی بۆ سه‌رجه‌م به‌شداربوانی روبه‌ڕوبونه‌وه‌ی په‌تای ڤایرۆسی كۆرۆنا.