كاندیدی ژمارەی یەكی یەكێتیی نیشتیمانیی كوردستان بۆ پۆستی پارێزگاری سلێمانی ژمارەی دەنگەکانی خۆی ئاشکرادەکات.

ئاسۆ فەرەیدون،لە پەیجی خۆی لەفەیسبووك، لە وتارێكدا ناراستەوخۆ هێرشدەكاتە سەر هەڤاڵ ئەبوبەكر و لە كۆتایشدا باس لە دەنگەكانی خۆی دەكات و دەڵێت، زیاتر لە 100 هەزار دەنگم هێناوە.

ئاسۆ فەرەیدون نووسیویەتی، "لەكاتێكدا بەندە وەك تەلەبەیەكی مەكتەبە مەزنەكەی یەكێتی، بەپێ ی ئەنجامی بەرایی دەنگە سەوزەكان، زیاتر لە سەد هەزار خونچەی متمانەم لە ئەستۆدایە، هەر یەكێك لەو دەنگانەش، قەرزی حەقێكی سەوزن بە گەردنمەوە و لەم كاروانەدا هێزمان پێدەبەخشێت، دەمانكانە مەئمورێكی دڵسۆزی متمانەكەیان، بەڵام فرەڕەنگی نەبێت ، هیچ لایەكمان بە تەنیا باخچەی ئاشتەوایی پێ ئاوەدان ناكرێتەوە .

لەبەشێكی دیكەی وتارەکەیدا، ئاسۆ فەرەیدون دەڵێت:  پانۆرامای سەوز، نیللی، زەرد، خاكی و پرتەقاڵی تێكەڵاونەبێت، دیمەنی سیاسی پارێزگاكەمان ڕوون نابێتەوە. خەڵك لە پێناو جەجاڵی و ئاشوب و قەیراندا ئەم چەپكە رەنگەی هەڵنەبژاردووە، بەڵكو گوتیان : ئیتر بەسە ، لەوە زیاتر ئەم شارە مەكەنە گۆڕەپانی كینە و ناكۆكی و ململانێ حیزبییەكانتان.