سه‌رۆكى هه‌رێمى كوردستان له‌گه‌ڵ باڵیۆزى به‌ریتانیا كۆبوه‌وه، لە دیدارەکەدا هه‌ردولا نیگه‌رانییان له دۆخى شنگال و پێشهاته‌كانى ناوچه‌كه ده‌ربڕى كه بوونه هۆى دووباره ئاواره‌بونه‌وه‌ى خه‌ڵكى ئێزدى.
به‌پێی راگه‌یه‌ندراوێكی سه‌رۆكایه‌تی هه‌رێمی كوردستان، به‌یانى ئه‌مڕۆ چوارشه‌ممه نێچیرڤان بارزانى، سه‌رۆكى هه‌رێمى كوردستان، پێشوازى له مارك برایسۆن باڵیۆزى به‌ریتانیا له عیراق و شاندێكى سیاسى و سه‌ربازیى یاوه‌رى كرد، له كۆبونه‌وه‌یه‌كدا بره‌ودان به په‌یوه‌ندییه‌كانى بەریتانیا له‌گه‌ڵ عیراق و هه‌رێمى كوردستان، دوایین پێشهاته‌كانى پرۆسه‌ى سیاسى عیراق، دۆخى ناوخۆى هه‌رێمى كوردستان، شه‌ڕى دژى تیرۆر و جموجۆڵه‌كانى داعش به‌تایبه‌تى له ناوچه‌كانى ماده‌ى (١٤٠)، گۆڕانى كه‌شوهه‌وا و كاریگه‌رییه‌كانى له‌سه‌ر عێراق و هه‌رێمى كوردستان و ناوچه‌كه، تاوتوێ كران.
ئاماژه به‌وه‌شكراوه، هه‌ردولا جه‌ختیان له گرنگی هه‌بوونى تێڕوانین و لێكگه‌یشتنى هاوبه‌شى لایه‌نه عیراقییه‌‌كان بۆ چاره‌سه‌رى كرده‌وه و هاوڕابون له‌وه‌ى، ئه‌گه‌ر بڕیار و ئیراده‌ى سیاسى هه‌بێت، ده‌رفه‌ت هه‌یه لایه‌نه‌كان بگه‌نه چاره‌سه‌رێكى كۆكه‌ره‌وه كه چه‌قبه‌ستویى و بنبه‌ستى سیاسى تێپه‌ڕێنێت.
له‌راگه‌یه‌ندراوه‌كه‌دا هاتووە" هه‌ردولا نیگه‌رانییان له دۆخى شنگال و پێشهاته‌كانى ناوچه‌كه ده‌ربڕى كه بونه هۆى دوباره ئاواره‌بونه‌وه‌ى خه‌ڵكى ئێزدى و جه‌ختیان له گرنگیى پێكه‌وه‌كاركردنى حكومه‌تى فیدڕاڵى عێراق و حكومه‌تى هه‌رێمى كوردستان بۆ گێڕانه‌وه‌ى ئارامى بۆ ناوچه‌كه كرده‌وه".