ئالان حەمە سەعید، وەزیری پەروەردەی حكومەتی هەرێمی كوردستان ژمارەیەك بڕیاری سەبارەت بە تاقیكردنەوەكانی نیشتمانی پۆلی 9ی بنەڕەتی دەركرد.

ئالان حەمە سەعید، وەزیری پەروەردە لەپەیامێكدا رایگەیاند، لەبەر بەرژەوەندی قوتابیان و خوێندكاران، ئاگاداری لیژنەی باڵای تاقیكردنەوەكان كردۆتەوە كە تاقیكردنەوەی نیشتیمانی پۆلی 9ی بنەڕەتی لە خولی یەكەمدا ( ڕۆژ نا ڕۆژێك ) دابنێن، بەجۆرێك  لە رۆژی 29ی (نیسان/4)ی 2023 دەستپێبكات و لە  رۆژی 10ی (ئایار/5)ی 2023 كۆتا تاقیكردنەوەی خولی یەكەم بێت، لەچەند رۆژی داهاتوشدا خشتەی تاقیكردنەوەكانی خولی یەكەم بڵاوبكەنەوە. 

ناوبراو ئاماژەی بەوەكردووە، سەرپەرشتیاران بەشێوەیەكی چالاكانە ڕۆڵ دەگێڕن لە تاقیكردنەوەكان بە سەرپەرشتیارانی بنەڕەتی و ئامادەییەوە، دابەشدەبن بەسەر قوتابخانەكان (حكومی و ناحكومی) و لە قوتابخانەكان و هۆڵەكانی تاقیكردنەوە دەمێننەوە. 

هەروەها وتویەتی "نابێت مامۆستایانی پۆلی 9ی بنەڕەت لە قوتابخانە (حكومی و ناحكومییەكان) چاودێری هۆڵەكانی تاقیكردنەوەی پۆلی 9ی بنەڕەتی بن".