فەرمانگەی میدیا و زانیاری هەرێم رایدەگەیەنێت" لە ڕێگەی سیستمی پریپەیدەوە پێدانی كارەبا دەكرێتە (٢٤) كاتژمێری".
بەپێی راگەیەندراوێك كە لەلایەن فەرمانگەی میدیا و زانیاری سەر بە حكومەتی هەرێمی کوردستان بڵاوکراوەتەوە تێیدا هاتووە" وەزارەتی كارەبا بەمەبەستی دابینكردنی كارەبای بەردەوام بۆ هاوڵاتیان، دەیەوێت سیستمی پریپەید بۆ شارەكان دابینبكات و ئەو شوێنانەی ئێستا كارەبایان كراوەتە ئەم سیستمە (٢٤) كاتژمێر كارەبایان هەیە".
هەر لە راگەیەندراوەكەدا هاتووە" بە پریپەیدكردنی كارەبای نیشتمانی، جگە لەوەی كارەبایەكی بەردەوام بۆ هاوڵاتیان دابین دەكات، لەو شوێنانەی سیستمەكە جێگیر كراوە، لۆدی سەر گۆڕەرەكانی كارەبا بە نزیكەی (٥٠٪) كەمبوەتەوە و كارەبای بەردەوام بۆ پڕۆژە، بیرەكانی ئاو و ڕوناكی شەقامەكان دابین كراوە، ئەمە جگە لەوەی كە ئەم سیستمەی كارەبا، دەتوانێت بارزۆری و كێشەی ڤۆڵتیە بە تەواوی چارەسەر بكات".
فەرمانگەی میدیا و زانیاری حكومەتی هەرێم پێیوایە کە سیستمی پریپەید، جگە لە ژینگەیەكی پاك و كارەبایەكی باش و بەردەوام، بارگرانی سەر شانی هاوڵاتییان، بەهۆی نەهێشتنی دوو سەرچاوەی پێدانی كارەبا كەمتر كردوەتەوە، لەو شوێنانەی سیستمەكەیان بۆ بەستراوە، سەرپێچییەكانی سەر كارەبا چارەسەر كراون و ژمارەی راستەقینەی هاوبەشانی كارەبا بە دیار كەوتون".
یەک ملیۆن و ٣٠٠ هەزار پێوەری زیرەك لە تەواوی هەرێمی كوردستان بەستراون کە (٩٢٪)ی هاوبەشان پێوەرەكەیان بۆ بەستراوە.