وەزارەتی بازرگانی حكومەتی هەرێم رایدەگەیەنێت، پرۆسەی وەرگرتنی گەنم لە سایلۆكانی هەرێمی كوردستان بەردەوامە.
وەزارەتی بازرگانی حكومەتی هەرێم لە راگەیاندراوێكدا رایگەیاندووە، پرۆسەی وەرگرتنی گەنم لە سایلۆكانی هەرێمی كوردستان بەردەوامە و تاوەكو ئێستاش زیاتر لە ٤٢١ هەزار تەن گەنم لە جوتیاران وەرگیراوە.
راگەیەنراوەكە ئاماژەی بەوەكردووە، لە پارێزگای سلێمانی بڕی ٢٠٦ هەزار تەن گەنم، لە پارێزگای هەولێر ١٠٥ هەزار تەن و لە پارێزگای دهۆكیش ١٠٩ هەزار تەن گەنم لە جوتیاران وەرگیراوە.
ئەمساڵ وەزارەتی بازرگانی عێراق بڕیارە ٥٠٠ هەزار تەن گەنم لە جوتیارانی هەرێم وەربگرێت و هەموو جۆرەكانیش بە پلە یەك وەربگرێت و نرخی هەر تەنێكیش بە ٨٥٠ هەزار دینار لە جوتیاران وەردەگرێت.