فراکسیۆنی پارتی لە پەرلەمانی عێراق سەبارەت بە ئەو هێرشانەی کە لالەیەن میلیشیاکانی ئێران کرایە سەر هێزی پێشمەرگە لە هەولێر راگەیەندراوێکی بڵاوکردەوە و ئاماژەیان بەوەداوە کە ئەم هێرشانە پێشهاتەیەکی مەترسیدارە و قوبوڵ ناکرێت و دەڵێت" هێرشەکان ئاماژەیە بۆ لاوازییەکی گەورە لەلایەن حکومەتی فیدراڵیەوە لە مامەڵەکردنی جددی و یەکلاکەرەوە لەگەڵ ئەم گرووپانەدا".
فراکسیۆنی پارتی لە پەرلەمانی عێراق سەبارەت بەو هێرشانەی کە لەلایەن گروپە میلیشیاکانی ئێران کرایە سەر خاکی هەرێم و هێزی پێشمەرگەی لە هەولێر کردە ئامانج، راگەیەندراوێکی بڵاوکردەوە کە تێیدا هاتووە" دووبارەبوونەوەی ئەم هێرشە تیرۆریستیانە بۆ سەر هەرێمی کوردستان لە لایەن گرووپە لە یاسا دەرچووەکان، بە شتێکی قبوڵنەکراو و پێشهاتێکی مەترسیدار دادەنرێت، کە ئاسایش و سەقامگیری هەرێمی کوردستان و سەلامەتی هاوڵاتیانی دەکاتە ئامانج، هەروەها ئاماژەیە بۆ لاوازییەکی گەورە لەلایەن حکومەتی فیدراڵیەوە لە مامەڵەکردنی جددی و یەکلاکەرەوە لەگەڵ ئەم گرووپانەدا، کە پاڵپشتی داراییان بۆ دابین دەکرێت و چەکدار دەکرێن لەلایەن ئەو لایەنانەی کە نایانەوێت سەقامگیری لە عێراق هەبێت".
فراکسیۆنی پارتی لە راگەیەندراوەکەیدا دەڵێت" داوا لە فەرماندەی گشتیی هێزە چەکدارەکان دەکەین، هەنگاوی خێرا و بەپەلە بگرێتەبەر، ئەو گرووپە لە یاسا دەرچوانە و ئەوانەی هاوکاریان دەکەن رابگرێت و لێپرسینەوەیان لەگەڵدا بکات، رووبەڕووی یاسایان بکاتەوە، کار بۆ کۆنترۆڵکردنی ئاسمانی عێراق بکات، و لێکۆڵینەوە بکات لە شوێنی ئاڕاسەتەکردنی ئەو فڕۆکە بۆمبڕێژکراوانە و شێوازی هاوردەکردنیان و ئەو لایەنانەی کە گرووپە لە یاسا دەرچووەکان بەم فڕۆکانە پڕچەک دەکەن".
لە بەشێکی دیکەی راگەیەندراوەکەی فراکسیۆنی پارتی لە پەرلەمانی عێراق هاتووە " ھەرێمی کوردستان بە سەرسەختی دەمێنێتەوە بەرامبەر بەو کەسانەی کە ھەوڵی تێکدانی ئاسایش و سەقامگیریی دەدەن و مەترسی لەسەر سەلامەتی ھاووڵاتیانی دروست دەکەن و ئەم هەوڵە نائومێد و بەدبەختانە بۆ تێکدانی ئاسایش و سەقامگیری هەرێمی کوردستان ی پڕشکۆ سەرکەوتوو نابێت".
شەوی شەممە بە دوو درۆنی بۆمبڕێژکراو هێرشکرایە سەر بارەگایەکی هێزی پێشمەرگەی کوردستان لە سنوری پیرمام- هەولێر جگە لە زیانی مادی هیچ زیانێکی گیانی لێنەکەوتەوە.