ئەمڕۆ چوارشەممە ١٣ی ئازاری ٢٠٢٤ ئەنجوومەنی وەزیرانی هەرێم کۆدەبێتەوە و لە کۆبوونەوەکەدا پرسی مووچەی فەرمانبەران و چەند تەوەرێکی دیکە تاوتوێ دەکات.
بەپێى خشتەى کارى ئەنجوومەنى وەزیرانى هەرێم، ئەمڕۆ ئەنجوومەنی وەزیرانی هەرێم بە سەرپەرشتی مەسرور بارزانی سەرۆک وەزیرانی هەرێم و ئامادەبوونی قوباد تاڵەبانی جێگری سەرۆک وەزیران (ماوە بۆدرێژکراوە)، کۆبوونەوەی خۆی ئەنجام دەدات.
بڕگەی یەکەمی کۆبوونەوەکە تایبەت دەبێت بە سەردانى شاندەکەى هەرێم بۆ ئەمریکا و کۆبونەوەکانیان لەگەڵ بەرپرسانى باڵاى ئەو وڵاتە و ئەم تەوەرەى گفتوگۆش لەلایەن مەسرور بارزانیەوە دەخرێتەڕوو.
هەروەها لە بڕگەی دووەمی کۆبوونەوەکەدا سەرۆکى دەستەى دەستپاکى راپۆرتێکى تایبەت بە جێبەجێکردنى (ستراتیژى نیشتیمانى روبەڕوبونەوەى گەندەڵى لە هەرێمى کوردستان - عێراق) کە پێشتر لەلایەن ئەنجومەنەکەوە پەسەند کرابوو تاوتوێ دەکرێت.
هەروەها بڕگەی کۆتایی کۆبوونەوەکە تایبه‌ت ده‌بێت به پرسى مووچەى فەرمانبەرانی هەرێم و لەلایەن وەزیرى داراییەوە هەنگاو و رێکارەکانى ئەم دواییانەى وەزارەتەکە و لایەنە پەیوەندیدارەکان دەخرێتەڕوو تایبەت بە مووچەى موچەخۆرانى هەرێم لە ژێر رۆشنایی دوایین پێشهات و گۆڕانکارییەکان.