بارزانی لە داڤۆسەوە بە میدیاکانی خۆیانی راگەیاند ئەم قەیرانەی کوردستان تیایدا دەژی حیزبەکان دروستیان کردووە"، ئەو پێیوایە کۆبوونەوەی پێنج لایەنەکە بەسەرچووەو دەبێت فراوانتربێت.
بارزانی لەو دیدارەدا لە گەڵ کەناڵ ٢٤ و رووداودا کە لەداڤۆس لەگەڵیدا سازکرابوو وتی" من موبادەرەم كرد و هەموو لایەنەكانم بانگهێشت كرد، هەموو دەرگایەكم كردەوە، ئەگەر نایەن، ئێمەش بەرنامەی دیكەمان دەبێت و ئێستا كاتی نییە باسی بكەین."
بارزانی كە بەشدارە لە كۆڕبەندی جیهانی، لەداڤوس وتی" بە تەئكید لەگەڵ یەكێتی زۆر گرنگە پارتی و یەكێتی رێكبكەون، بەڵام قەتعەن پارتی ناگەڕێتەوە بۆ رێككەوتنی پێنج قۆڵی و دەبێت هەموو حزبەكان بەشدار بن و نەك بوترێن پارتی و چوار حزبەكە و ئەو دەستەواژەیەم قبووڵ نییە و پارتی جارێكی دیكە ناگەڕێتەوە بۆ ئەنجامدانی كۆبوونەوەی پێنج قۆڵی، بەلانی كەم ئەو حزبانەی بەشدارن لە پەرلەمان و حكومەت و ئەوانەشی نوێنەریان نییە دەبێت راوێژیان پێبكرێت و من خۆم مانعم نییە هەموویان بەشدار بن لە كۆبوونەوەكان، بەڵام پێنج قۆڵی تەواو".
لەبارەی ئەوەی كە كۆبونەوەی كەسی یەكەمی لایەنەكان چارەسەری قەیرانەكان دەكات بارزانی وتی " ئەم قەیرانە حزبەكان درووستیان كردووە و نازانم دەتوانن چارەسەری بكەن یان نا بەڵام بە تەئكید ئەوان درووستیان كردووە. با كەسی یەكەمەكان كۆببنەوە و كێ رێی لێگرتوون.. ئەوان كۆدەبنەوە و سەركردایەتی و مەكتەب سیاسییەكان كۆدەبنەوە. ئەو پرسیارەش هەیە جارێ دەبێت بگەڕێین بزانین كێن سەركردەكان هەندێك حزب سەركردەكانیشی دیار نیین تا بێن حازر بن".