مەریوان وریا قانع نوسەر و ڕۆشنیبیری دیاری کورد، پێی وایە کە بەختیار عەلی شایستەی خەڵاتی نۆبڵە بۆ ئەدەب، بەڵام بەختیار عەلی خاوەنی کۆمەڵێک تێزی بێ مانا و ترسناکە.

لە میانی کۆڕێکیدا کە سنور میدیا لە شاری کەلار بۆ هەردوو نوسەر و ڕۆشنبیر، مەریوان وریا قانع و ئاراس فەتاح ئەنجامی دابوو، لە وەڵامی پرسیارێکدا سەبارەت بە بەختیار عەلی نوسەر و ڕۆمانووسی بەناوبانگی کورد، مەریوان وریا قانع ڕایگەیاند "باوەڕناکەم کەس لەناو کورددا کەس بەقەد من بەختیار عەلی بناسێت و چاوەڕێی ئەوەم خەڵاتی نۆبڵ بۆ ئەدەب وەربگرێت، بەڵام کاک بەختیار خاوەنی کۆمەڵێک تێزی فیکری بێ مانا و ترسناکە و کاریگەری زۆر ترسناکیان لەسەر نوخبە ڕۆشنبیرییەکەی هەبووە، ئەوەی کاک بەختیار دەڵێت هەمووی فاشیزمە من قسە ناکەم".

مەریوان وریا دەڵێت "یەعنی پارتی و یەکگرتوو و زەحمەتکێشان و گۆڕان فاشیزەمە، ناچێتە چوارچێوەی قاڵبی خوێندنەوەی زانستییەوە، ئەمە لای من وەهم و خورافیات دروست دەکات".

ئاراس فەتاح و مەریوان وریا قانع پێیان وایە کە پارتی ئاڵای دەوڵەتی هەڵگرتووە، بەڵام ئەو هێزە ناتوانێت دەوڵەت دروست بکات.