وتەبێژی وەزارەتی پەروەردە ڕایگەیاند، ئەمساڵ ئەنجامی تاقیکردنەوەکانی 9ـی بنەڕەتی دوادەکەوێت و دەکەونە دوای ئاشکراکردنی ئەنجامەکانی پۆلی 12ـی ئامادەیی.

سامان سیوەیلی، وتەبێژی وەزارەتی پەروەردەی حکومەتی هەرێمی کوردستان بە ڕووداوی وتووە "ئەگەری هەیە دوای هەفتەیەک لە تەواوبوونی تاقیکردنەوەکانی پۆلی 12ـی ئامادەیی ئەنجامەکان رابگەیێندرێن، بەڵام ئەنجامی تاقیکردنەوەکانی پۆلی 9ـی بنەڕەتی دەکەوێتە دوای ئاشکراکردنی ئەنجامەکانی 12ـی ئامادەیی و رەنگە زیاتر لە دوو هەفتەی دیکە بخایەنێت".

هەروەها لە بارەی دواکەوتنی پێدانی نمرەکانی پۆلی نۆوە، وتەبێژەکەی وەزارەتی پەروەردە ڕایگەیاند "نمرەی تاقیکردنەوەکانی خوێندکارانی 9ـی بنەڕەتی لە سەرجەم پارێزگاکانەوە دێنەوە وەزارەتی پەروەردە، ئەمەش کاتێکی زۆری پێدەچێت، چونکە تاوەکو ئێستا لە پارێزگای سلێمانی تەنیا نمرەی تاقیکردنەوەکانی چوار وانە رەوانەی وەزارەت کراوە، بەمەش کاتێکی درەنگتر ئەنجامەکان رادەگەیێندرێن".