وەزارەتی تەندروستی هەرێمی کوردستان بڕیاریدا پێویستە لەمەودا نەخۆشانی تووشبووی ڤایرۆسی جگەر و ڤایرۆسی HIV تووشبووی ئایدز، هاوشێوەی نەخۆشانی ئاسایی چارەسەر بکرێن.

د. رێکەوت حەمەرەشید، وەزیری تەندروستی هەرێمی کوردستان بە ڕووداوی وتووە دەبێت لەکاتی پێویستدا نەخۆشانی تووشبووی ئایدز و ڤایرۆسی جگەر هاوشێوەی نەخۆشانی دیکە کاریان بۆ بکرێت و جەختدەکاتەوە نابێت بەهیچ بیانوویەک چارەسەرەکەیان دوابخرێت.

ماڵپەڕی ڕووداو رێنماییەکانی وەزارەتی تەندروستی سەبارەت بە شێوازی چارەسەرکردنی نەخۆشانی تووشبووی ڤایرۆسی جگەر و ئایدز بڵاوکردووەتەوە کە بەم شێوەیەیە

١- پێویستە کەمترین کارمەند لە ژووری نەشتەرگەرییەکە کاربکەن و کەمترین ئامێری پزیشكی بەکاربهێندرێن، هاوکات ئەوانەی کە بەکاردەهێندرێن، دەبێت ئەوانەبن کە دوای بەکارهێنان فڕێدەدرێن.

٢- پێویستە ئەو کارمەندانەی زانیارییان کەمە لە بەکارهێنانی رێنماییەکانی خۆپاراستن و کارکرن لەو حاڵەتانە، خولی تایبەتیان بۆ بکرێت.

٣- پێویستە ئامێرە نووکتیژەکانی وەک شفرە و دەرزی لە ئاستێکی زۆر بەرزی رێنماییەکان بەکاربهێندرێن و نابێت دەستاودەستکردنی زۆر رووبدات تاوەکو کەمترین بەرکەوتن رووبدات.

٤- هەموو ئەو ئامێر و پاشەڕۆ پزیشکییانەی کە لە نەشتەرگەرییەکەدا بەکارهاتوون دەبێت لە سەتڵی تایبەتی پاشەڕۆی پزیشكییەکاندا لە کیسی رەنگ زەرددان دابندرێن.

٥- پێویستە بۆکسی پاراستن (Safety box) دوای تەواوبوونی نەشتەرگەری دابخرێت و بنێردێت بۆ شوێنی تایبەتی سووتاندنی پاشەڕۆ پزیشکییەکان.

٦- ئەو پێداویستییانەی دەتواندێت بخرێنە نێو ئۆتۆکلەیڤ (autoclave) کە بۆ پاککردنەوە بە گەرمکردن بەکاردێت، دەتواندرێت دووبارە بەکاربهێندرێنەوە و پێویست ناکات ببردرێنە شوێنی تایبەتی سووتاندنی پاشەڕۆ پزیشکییەکان.

٧- پێویستە هەموو کەلوپەلەکانی کە بۆ یەکجار بەکارهێنان نین، بۆ سەنتەری تایبەت بە خاوێنکردنەوەی پزیشكی بنێردرێن و نیشانەکراوبن بە مەترسیدار.

٨- پێویستە هەموو پارچە قوماش، سەدریە و چەرچەفەکان بشۆردرێن و نیشانەکراوبن کە پیسبوون بە میکرۆب.

٩- پێویستە ئامێری مژینی یەکجار بەکارهێندراو بەکاربێت و ئەگەر نەبوو دواتر لە ئۆتۆکلەیڤ خاوێنبکرێتەوە.

١٠- دەبێت ئەو نموونانەی لە نەخۆش وەردەگیرێن، کەمترین بەرکەوتنیان هەبێت بۆ دەست، لەکاتی وەرگرتن و پشکنینیان دەبێت لە قوتووی داخراو هەڵبگیرێن و دواتر بنێردرێن بۆ شوێنی سووتاندن.

١١- هەموو رووەکانی زەوی و دیواری ژووری نەشتەرگەری دوای نەشتەرگەرییەکە دەبێت بە ئاو و سابوون لەسەرووی ئاستی دەستەکان بشۆردرێنەوە.

١٢- هەموو ئەو بەشانەی کە بەرکەوتوون بە خوێن و شلەکانی دیکەی لەشی نەخۆشەکە دەبێت پاکبکرێنەوە و ئەو ئامێرانەی بۆ پاککردنەوە بە گەرمکردن ناشێن، دەبێت بە پرۆسەی پاککردنەوە بە ساردی بنێردێن و لەکاتی گواستنەوە و هەڵگرتنیان دەبێت بە وریایی مامەڵەیان لەگەڵ بکرێ.

١٣- پێویستە ئامێری سڕکردن و هەموو ئەوانەی پەیوەندیان بە کۆئەندامی هەناسەی نەخۆشەوە هەیە، بە شێوازی تایبەت پاکبکرێنەوە.