بەهۆی ژێرئاوكەوتنی بەلەمێك لە كەناراوەكانی شارۆچكەی دێمرەی سەر بە پارێزگای ئانتالیا، نۆ كۆچبەر خنكان كە شەشیان منداڵن.
میدیاكانی توركیا بڵاویانكردوەتەوە كاتژمێر 2:20 خولەكی شەوی رابردوو فەرماندەیی ئاسایشی كەناراوەكان زانیاریی ئەوەی بەدەستگەیشت، بەلەمێك كە ژمارەیەك كۆچبەری نایاسایی هەڵگرتووە، بەدووریی دوو میل و نیوی دەریایی لە باشووری رۆژئاوای دوورگەی گەیكۆڤا لە مەترسیی ژێرئاوكەوتندایە و رەنگە ژێرئاویش كەوتبێت.
باس لەوەشكراوە، دەستبەجێ فەرماندەییەكە چوار بەلەمی هێزە ئەمنییەكان و فڕۆكەیەك و هەلیكۆپتەرێكی رەوانەی شوێنەكە كرد.
لە ئەنجامدا هێزەكان توانیان چوار كەس لە خنكان رزگار بكەن كە یەكێكیان ژنە، هاوكات ماسیگرەكانی دەورووبەریش كەسێكی دیكەیان رزگاركردووە.
ئاماژەبەوەشكراوە، دواتر كۆچبەرە رزگاركراوەكان رەوانەی كێكۆڤا كران و رادەستی ئۆتۆمبێلی فریاكەوتن كران تا رەوانەی نەخۆشخانە بكرێن.
هاوكات تەرمی نۆ كۆچبەر كە شەشیان منداڵ و یەكێكیان ژنە لە ئاوەكە دەرهێنرانەوە.
بە وتەی كۆچبەرە رزگاركراوەكان بەلەمەكە 14-15 كەسی لەناودابووە و لە ئێستادا تیمەكان بەدوای كەسێكی دیكەدا دەگەڕێن كە پێدەچێت بێسەروشوێن بن و پۆلیسی توركیاش تاوەكو ئێستا ناسنامەی قوربانییەكانی رانەگەیاندووە.