پۆلیسی راپەرین ئاماژە بۆ ئەوە دەکات ئەمڕۆ ( ۷ / ۷ / ۲۰۱۸ ) کاتژمێر ( ۸ ) بەیانی تەرمی منداڵێکی تەمەن چوار ساڵ لە ڕەگەزی مێ بەناوی ( ڕ،م،ٲ ) دانیشتوی ڕانیە/ گوندی هەنجیرەی تازە هێنرایە نەخۆشخانەی گشتی ڕانیە کە شوێنەواری یەک فیشەک بەسەر سەریەوە هەیە.
لە راگەیاندنێکدا پۆلیسی راپەرێن ئاشکرای دەکات " لە گەڵ بیستنی هەواڵەکە دەستبەجێ ئەفسەری ئێشکگری بەشی پۆلیسی ڕانیە و بەڵگەو تاون و بنکەی پۆلیسی کێوەڕش گەشتنە شوێنی ڕوداوەکە و دەستگیرا بەسەر چەکی بەکارهاتوو لە جۆری کڵاشنکۆف".
هەروەها هاتووە "مەلەفی لێکۆڵینەوە بۆ ڕوداوەکە کرایەوە، بە وتەی باوکی مناڵەکە ڕوداوەکە لەکاتێک دابووە کە باوکی بەناوی ( م،ٲ،م ) پیشەی پێشمەرگە خەریکی خۆ ئامادەکردن بووە بۆ دەوام بەڵام لەوکاتە دەچێتە دەرەوە سەرقاڵی هەندێک کاری ماڵەوە بووە لەوکاتەشدا برایەکی منداڵەکە بەناوی ( ح٫م،ٲ ) تەمەن ۱۰ ساڵ دەستکاری چەکەکەی کردووە و فیشەکێک لەدەستی دەرچووە و بەری سەری کچەکەی کەوتووە".
تەرمی مناڵی ناوبراو بەڕێکرا بۆ پزیشکی دادوەری ڕانیە و دوای ئەنجامدانی توێکاری پزیشکی بۆ تەرمەکەی ڕادەستی کەسوکاری کرایەوە.
پۆلیسی راپەڕین دەڵێت "لەسەر ڕوداوەکە باوکی منداڵەکە بە بڕیاری دادوەر ڕاگیرا بەپێی ماددەی ( ٤۱۱ ) لە یاسای سزادانی عێڕاقی . لێکۆڵینەوە لە ڕوداوەکە بەردەوامە".
ئا: ئەمیر حەسەن