بەرهەم ساڵح دەتوانێ؟
رێبوار كەریم وەلی
سیاسییەكی شارەزا و تێكنۆكراتێكی لێوەشاوە كە بەدەردی یوسفی كەنعان چووە، ئیتر هیچ شانسێكی لەبەردەمدا نەماوە مەگەر ئەوەی لەو بیرەی (براكانی) تێیانهاویشتووە، بهێنرێتە دەرێ. پێگەی دكتۆر بەرهەم ساڵح لەناو یەكێتیدا و رۆڵی ئەو پیاوە لە دروستكردنی رایەڵەكانی پەیوەندیی نێودەوڵەتی و ناوچەیی، هەمیشە جێگەی ئیرەیی بەناو هاوقەتارانی بووە. گوناهی ئەو پیاوە ئەوە بوو كە كوڕی پیاوێكی خوێندەوار بوو، لە باوكەوە مەلایی و لە دایكەوە جەلالی! قەت دڵی دایكی نەشكاند، بەڵام شكۆی باوكیشی پاراست. ئەوە راستییە كە هەموو جەلالییە كۆنەكان بۆ رۆژێكیش بێت مەلایی بوونە!
برایم ئەحمەد، جەلال تاڵەبانی و نەوشیروان مستەفا و زۆر كۆنە مەلایی دیكە كە لە بارزانی هەڵزۆقینەوە و ویستیان ببن بە پرۆژەی ئاڵتەرناتیڤ، فەشەلیان هێنا و خۆیان عاقیبەت بوون بە (مەلاییە نوێیەكان). چونكە كۆڵەگەی سیاسەتكردنیان پتر لەوەی دژایەتیی پارتی بێت، گەڕانەوەیەكی شایستە بوو بۆ باوەشی پارتی و پەیداكردنی پلە و پۆستی بەرزتر لای ماڵی بارزان (بەرهەم ساڵح دەمێكە ئەو شانسەی هەیە و قەت بیری لە بەكارهێنانی نەكردووەتەوە).
ئەوان لە ژیانی سیاسیی خۆیاندا قەت نەیانتوانی شتێك پێشكەش بكەن كە بتوانێ تەجاوزی پارتی و بارزانی بكات. بۆیە ئەم بەرەیە پێویستی بە رابەرێكی نوێ هەیە بتوانێ تەجاوزی ئەو عوقدە مێژووییە بكات كە (لە سلێمانییەوە) باڵی بەسەر سیاسەت و ئایندەی كوردستاندا كێشاوە. بزووتنەوەیەك كە لە هەموو پرسە نەتەوەیی و نیشتمانییەكاندا (بێ قەید و شەرت) لە ریزی پێشەوە بێت، بەڵام بەقەدەر سەرە دەرزییەك لە كەمایەسیەكانی حوكمڕانی خۆش نەبێت. چونكە پارتی خاڵی لاوازی ركابەرەكانی كەشف كردووە، ئەویش ئەوەیە كە سەرباری ئەوەی لە كارنامەیدا 31ی ئابیش هەیە، بەڵام دەرسی نیشتمانپەروەری دەداتە ركابەرەكانی!
بزووتنەوەی سیاسیی سلێمانی بەدەست قەیرانی ناسنامەوە گیری خواردووە، رۆژێك لە دژی مەلا مستەفای عەشایر دەبێ بە كۆمۆنیست، دواییش هەر خۆی كۆمۆنیست قەڵاچۆ دەكات! شەڕی ئیسلامی سیاسی دەكات و دوایی هەرچی كۆنە ئیخوان و تیرۆریستە وەك سیمبولی نوێخوازی پێشكەشی كۆمەڵگا دەكات! بۆیە گۆڕانی راستەقینە ئەوكاتە روودەدات كە ئەو جوڵانەوە مەدەنییە بتوانی خۆی تەعریف بكات.
ئێستا بەرهەم ساڵح لە غیابی تاڵەبانی و نەوشیروان مستەفادا دەتوانێ تەجاوزی ئەو عوقدە مێژووییە بكات و ئاراستەیەك بۆ شەراكەت و ململانێ لەگەڵ پارتیدا دروست بكات، نە ببێتە پاشدز و نە ببێتە هاوماڵ. ئەو نە لە هەكاری و نە لە قڕناقە و پشتئاشان، نە لە كڵاوقاسم و كەپكی حەمەدئاغا بڕیاری كوشتنی براكانی نەداوە تا شەرمەزاری مێژووی خۆی بێت، بۆیە ئەو دەتوانێ.
گێژاوی گۆڕان
(2)
ئەڵبەتە میراتی نەوشیروان مستەفاش (وەك ئۆجاغكوێری سیاسی) هیچ جیاوازییەكی ئەوتۆی لەگەڵ سەركردەكانی پێش خۆی نییە، ئەویش موڵك و ماڵ و دارایی بزووتنەوە سیاسییەكەی بۆ موستەحەقترین كەسەكان بەجێهێشت كە منداڵەكانی خۆی بوون، هاوكات مەسەلەی جێگرەوەی خۆیشی وەك كەرەستەیەكی ململانێی سیاسیی ئەبەدی بۆ هاوقەتارانی كردە میرات تا دوای كۆمەڵێك ملشكاندن و پەرتەوازەیی، وارسە حەقیقییەكانی (كوڕەكانی) رێشمەی بزووتنەوەكە بگرنە دەست.
سەنگی مەحەكی جیاوازیی گۆڕان ئەوكاتە بوو كە نەوشیروان مستەفا نەمێنێت. چونكە لە بنەڕەتدا بە حزووری نەوشیروان مستەفا، فۆرمی حزبی كوردی هەمان تاس و حەمام بوو. هەشت ساڵە ئەو حیزبە تەنها یەك كۆنگرەی بەستووە و لەكاتێكدا كە رێكخەری گشتی لە ژیاندا بوو، هیچ ئۆرگانێك و دامەزراوەیەك بۆیان نەبوو قسە لەسەر قسەی ئەو بكەن یان بڕیارە تاكە كەسییەكانی رەتبكەنەوە.
هاوكات هەڵبژاردن و گۆڕینی سەرۆك تابۆ بوو! بۆیە هەرچەندە ئەو بزووتنەوەیە پێش مەرگی رێكخەرەكەی، ئینتیحاری سیاسیی كردبوو، بەڵام لێرە بەولاوە ململانێیەكی سەخت لەسەر (مالیكیەتی) گۆڕان دەستپێدەكات و پێناچێ وا بە ئاسانی كۆتایی بێت.
نەوشیروان مستەفا یۆتۆپیایەكی (ئەڵبەتە نا راستەقینەی) لە زیهنیەتی ئەوانەدا دروست كردبوو كە خۆی (هەڵیدەسوڕاندن) و ئەوانیش خۆیان پێ هەڵسووڕاو بوو! بۆیە ئێستا هەڵسوڕاوەكان بەتەنگ ئەوەوەن كە پەتەكانی خۆیان بپچڕێنن، چونكە كەس نازانێ تا ئێستا چۆن گەمەی كردووە. ئاراستەیەك دەیەوێ گۆڕان (كۆمەڵەی رەنجدەرانی پێشوو) بكاتە حیزبێكی ئیسلامیی عەیار بیستوچوار و ئەوەی دیكەش بەتەنگ گەڕانەوەیەكی شەرافەتمەندانەیە بۆ باوەشی یەكێتی! لەو بەینەشدا جەماوەرەكەیان سەریان لێشێواوە.
دوو سوورچی
(3)
یەكیان پارتی و ئەوەی دیكەیان یەكێتی، هەردووكیان دیلی دەستی داعش. یەكیان زەق زەق و گۆشاوگۆش بەبەرچاوی هەموو دنیاوە سەری لە جەستەی جیاكرایەوە: هوجام. ئەوەی دیكەیان سەید ئەحمەد كە ئەویش ئیفادەی دەموچاوی دوای رزگاربوونی هیچی لە ساتەوەختی سەربڕینی هوجام كەمتر نەبوو. هوجام كۆڵێك منداڵی هەتیوی لەپاش خۆی بەجێهێشت، بەڵام شوكر سەید ئەحمەد هاتەوە ناو خێزانی.
گرنگ نییە كێ سەید ئەحمەدی رزگار كرد، دیل بەدیلیان پێ كرد یان شێرە كوڕانی (جەنگی) دەستەویەخەی زانیاری رزگاریان كرد، بەڵام پرسیاری سەرەكی لە كاربەدەستانی وەزارەتی پێشمەرگە ئەوەیە: كەسێكی وەكو سەید ئەحمەدی خاوەن پێداویستیی تایبەت لە ریزی پێشەوەی جەبهەی شەڕ چی دەكرد؟ ئەسڵەن بە هەموو پێوەرە پیشەییەكان، كەسانی وەكو سەید ئەحمەد نەك ناكرێ و ناشێ لە بەرەی پێشەوەی شەڕ بن، تەنانەت سەربازیی زۆرەملێیش نایانگرێتەوە. بۆیە پێش ئەوەی مرۆڤ دانیشێ پرسیار لەوە بكات كە كێ سەید ئەحمەدی رزگار كرد، دەبێ ئەو پرسیارە بكات كە كێ ئەوی دامەزراند و بردییە بەرەی پێشی پێشەوەی شەڕ؟!
17/07/2017
وتارەکانی تری نوسەر