دوای مانەوەی 11 رۆژ لە نەخۆشخانە گەنجێك بە هۆی زۆری رێژەی سوتانی گیانی لەدەستدا، كەسواكارەكەی ئاسایشی دهۆك تۆمەتبار دەكەن بە سوتاندنی رۆڵەكەیان.

برایەکی عەلی حسێن ئەمڕۆ 26/2 رایگەیاند: براکەیان ڕۆژی ١٤ی ئەم مانگە لەلایەن ئاسایشی دهۆکەوە بەتۆمەتی بەکارهێنانی ماددەی هۆشبەر دەستگیرکراوە، بەڵام هەر ئەو ڕۆژە براکەیان بە سوتاوی ڕادەستکردۆتەوە و پاش مانەوەی لە نەخۆشخانە بۆ ماوەی ١١ ڕۆژ گیانی لەدەستداوە.

هاوکات خوشکێکی عەلی حسێن کە لە نەخۆشخانە چاودێری کردووە و گرتەیەکی ڤیدیۆیی ناوبراوی تۆمارکردووە بە ئێن ئاڕ تی وتووە: براکەیان لەلایەن ئاسایشی دهۆکەوە سوتێندراوە و براکەشی ئەوە پشتڕاستدەکاتەوە.
كەسوكاری عەلی حسێن داوا دەکەن ڕاستی و دروستی ڕووداوەکە ئاشکرا بکرێت و مافی براکەیان بسەندرێتەوە.

جێگەی باسە عەلی حسێن تەمەنی ٣٦ ساڵ بووە و خەڵکی دهۆک بووە، پێش گیانلەدەستدانی ماوەی پێنج ساڵ بووە کە لە ئێران گەڕاوەتەوە هەرێمی کوردستان و لەکاتی دەستپێکردنی شەڕی داعشدا بووەتە پێشمەرگە، دوای دوو ساڵ لە بوونی بە پێشمەرگە، عەلی حسێن دوورخراوەتەوە.