به‌گوێره‌ی ڕاپۆرتێكی گۆشه‌ی ئابوری ژووری توێژینه‌وه‌ی سیاسی بزوتنه‌وه‌ی گۆڕان، كه‌ وێنه‌یه‌كی بۆ سپی نێردراوە‌، له‌م مانگی ئەیلولدا هه‌رێمی كوردستان له‌ڕێگه‌ی بۆرییه‌وه‌ بۆ به‌نده‌ری جه‌یهانی توركیا، 17 ملیۆن و 515 به‌رمیل نه‌وتی هه‌نارده‌كردووه‌، هه‌روه‌ها له‌كێڵگه‌كانی شێخان كه‌ له‌ڕێگای ته‌نكه‌ره‌وه‌ ده‌ڕوات بۆ توركیا، به‌پێی رێكه‌وتنی حكومه‌تی هه‌رێم و كۆمپانیاكه‌، كه‌ له‌ڕۆژی 23ی شوباتی 2017، كراوه‌، ملیۆنێك و 101 هه‌زار به‌رمیله‌، كۆی هه‌نارده‌كه‌ش 18 ملیۆن و 616 هه‌زار به‌رمیل بووه‌.

له‌و ڕاپۆرته‌دا ئه‌وه‌شخراوه‌ته‌ڕوو، "تێكڕای نرخی به‌رمیلێك نه‌وت له‌مانگی ئه‌یلول، 55 دۆلار بووه‌، نه‌وتی هه‌رێمیش به‌ 8 دۆلار كه‌متر له‌نرخی بازاڕه‌كان ده‌فرۆشرێت، به‌و جۆره‌ش به‌رمیلێك نه‌وتی به‌ 47 دۆلار فرۆشتووه‌و كۆی داهاته‌كه‌شی له‌و مانگه‌دا 874 ملیۆن و 952 هه‌زار دۆلار بووه‌".

له‌ به‌شێكی دیكه‌ی راپۆرته‌كه‌ی گۆشه‌ی ئابوری ژووری توێژینه‌وه‌ی سیاسی بزوتنه‌وه‌ی گۆڕان هاتووه " داهاتی هه‌رێم له‌و نه‌وته‌ی كه‌ به‌ پاڵاوتگه‌و كۆمپانیاكانی ناوخۆی ده‌فرۆشێت، به‌ 150 ملیۆن دۆلار ده‌خه‌مڵێنین، به‌و جۆره‌ش كۆی داهاتی هه‌رێم له‌ فرۆشتنی نه‌وت له‌مانگی ئه‌یلول، ملیارێك و 24 ملیۆن و 952 هه‌زار دۆلاره"‌.