وەزیری گواستنەوەو گەیاندنی حكومەتی هەرێم مەرجی بەغدا بۆ كردنەوەی فڕۆكەخانەكانی هەرێم و ئەنجامدانی گەشتە نێودەوڵەتیەكان ئاشكرادەكات.
مەولود باوەموراد وەزیری گواستنەوەو گەیاندنی حكومەتی هەرێم بەوەكالەت لە لێدوانێکی رۆژنامەوانیدا ڕایگەیاندوە " بەڕوونی لەلایەن دەسەڵاتی فڕۆكەوانی مەدەنی عیراقەوە پێمانڕاگەیەنراوە، هیچ گۆڕانكارییەك لەبڕیارەكەی حكومەتی عیراقدا لە بارەی راگرتنی گەشتە نێودەوڵەتیەكانی فڕۆكەخانەكانی هەرێم ناكرێت تائەوكاتەی گفتوگۆی نێوان هەرێم و بەغدا لەسەر تەواوی كێشەكان چارەسەردەكرێت".
ناوبراو لە درێژی لێدوانەکەیەدا وتی "مەرجی بەغدا بۆ كردنەوەی فڕۆكەخانەكانی هەرێم، چارەسەركردنی تەواوی كێشەكای هەرێم و بەغدایە بەڕێگەی دانوستان وگفتوگۆ".
سەبارەت بەناردنی تیمی تایبەت لەلایەن حكومەتی عیراقەوە وەزیرەکەی هەرێم وتی"تائێستا هیچ بڕیارێك بۆ ناردنی تیمی مەدەنی و سەربازی نەدراوەو جگەلەوەش هیچ بڕیارێك نەدراوە كە هەرێم وەفدی تایبەت بۆ گفتوگۆكردن لەبارەی گرفتی فڕۆكەخانەكانەوە ڕەوانەی بەغدا بكات".