سەرچاوەیەك لە وەزارەتی دارایی و ئابووری حكومەتی هەرێم بە "سپی" ڕاگەیاند موچەی مانگی 1ی ساڵی 2019ی فەرمانبەران و موچەخۆرانی هەرێمی كوردستان كە دەبوو ئەم هەفتەیە دەستی پێبكردایە بەهۆی ئەوە بووە كە هەفتەی پێشوو زۆرینەی وەزارەتەكان لیستی مووچەیان بە لێبڕینی پێشینەكانەوە ئامادە كردبوو، بۆیە وەزارەتی دارایی داوای لێكردن، بە بێ لێبڕینەكان لیستی مووچە ئامادەی بكەن، هەروەها وەزارەتی سامانە سروشتییەكان مانگانە لە 1ی مانگەوە 378 ملیار دینار بۆ وەزارەتی دارایی دەنێرێت، بەڵام ئەم مانگە لە 3ی مانگ پارەی ناردووە.

سەرچاوەكە دڵنیاییشیدا لەوەی ئەم دواكەوتنە كاریگەری نابێ لەسەر دواخستنی مووچەی هەموو وەزارەتەكان و ئەم مانگەش لە كاتی خۆیدا كۆتایی بە دابەشكردنی مووچەی هەموو وەزارەتەكان خانەنشینیی مەدەنی و سەربازیش دێت.

ماوەی ساڵێكە وەزارەتی دارایی حكومەتی هەرێم بەگشتی لە 5ی هەر مانگێكدا دەست بە دابەشكردنی موچە دەكات و لە 26ی هەمان مانگدا كۆتایی پێدەهێنێت.

هەر بەگوێرەی زانیاریەكان رۆژی یەكشەممە 7ی نیسانی 2019 دابەشكردنی مووچەی مانگی كانونی دووەم دەستپێدەكات و یەكەم وەزارەت كە موچە وەردەگرێت دیوانی وەزارەتی پێشمەرگە و لیواكان دەبێت.

هەروەها وەزارەتی پەروەردە و تەندروستی و وەزارەتی دارایی بە پێی ریزبەندی بەدوای یەكدا وەریدەگرن.

رۆژی 8ی مارسی 2018، حكومەتی هەرێم بە بڕیارێك سیستمی پاشەكەوتی مووچەی هەڵوەشاندەوە و مووچەی مانگی 12ی ساڵی رابردوو بەبێ پاشەكەوت دابەشكرا.