بە مەبەستی دابینكردنی هەلی كار، لەلایەن ڕێکخراوی "GIZ" ئەڵمانیەوە ناونووسین لە سنووری ناحیەی خورماڵ سەر بە پارێزگای هەڵەبجە دەستپێدەكات.
بەڕێوەبەرایەتی ناحیەی خورماڵ رایگەیاند سبەی یەكشەممە تیمێكی گەڕۆكی وەزارەتی كار و كاروباری كۆمەڵایەتی بە هاوكاری رێكخراوی "GIZ"ی ئەڵمانی سەردانی ناوچەكەیان دەكات بۆ ناونووسكردنی ئەو هاووڵاتییانەی كە بێ كارن.
روونیشیكردەوە هەڵمەتەكە لە كاتژمێر 10:30 سەرلەبەیانی تا 2:30ی پاش نیوەڕۆ بەردەوام دەبێت و هەموو ئەو هاووڵاتییانە دەگرێتەوە كە تەمەنیان لە نێوان 18 – 60 ساڵیدایە بە هەردوو رەگەزی نێر و مێ.
بەڕێوەبەرایەتی ناحیەی خورماڵ ئەوەشی خستەڕوو كە ئامانجی ناونووسینەكە رەخساندنی ھەلی کار و ناونوسینە بۆ خولی راهینان لە داھاتوودا.
داواشیكردووە كە ھەر کەسێك ئارەزوومەندە ناوی خۆی تۆمار بکات رۆژی یەكشەممە لە هۆڵی شەهید سامان لە خورماڵ ئامادە بێت و ناسنامەی باری شارستانیش لەگەڵ خۆی ببات.