شارەوانی چەمچەماڵ ڕایگەیاند، بەهۆی کردنەوەی كارگەیەكی ڕیسایكلین لە تەکیە هەلی کار بۆ 400 کەس دەڕەخسێت.
ئەمڕۆ یەك شەممە، 28ی تەموز هەڤاڵ ئەبوبكر، پارێزگاری سلێمانی و ئازاد محەمەد، سەرۆكی ئەنجوومەنی پارێزگای سلێمانی و كەمال مستەفا، بەڕێوبەری گشتی شارەوانیەكانی سلێمانی، كارگەی ڕیسایكلینی خاشاكیان لە شارەدێی تەكیە بەسەركردەوە و لەلایەن ڕەمەك ڕەمەزان، قائیمقامی چەمچەماڵ و ئارام نەجات، سەرۆكی شارەوانی چەمچەماڵ و بەرپرسانی ئیدارییەوە پێشوازیان لێكرا.
شارەوانی چەمچەماڵ لە ڕاگەیەندراوێكدا کە وێنەیەکی دەست (سپی) کەوتووە، ئاماژەی بەوەكردووە، ئەم پڕۆژەیە خاشاكی ۲۱ شارەوانی تێدا كۆدەكرێتەوە و ڕۆژانە توانای وەرگرتنی ٥۰۰ تەن خاشاكی هەیە و دووبارە ئەو خاشاكە بەكاردەهێنرێتەوە لەكارگەكاندا.
ئەوەشی خستۆتەڕوو، بەتەواوی بوونی كارگەكە نزیكەی 400 هەلی كار بۆ سنووری شارەدێی تەكیە و شارۆچكەی چەمچەماڵ دابین دەكات.
ڕەمك ڕەمەزان، قائیمقامی چەمچەماڵ لە وتەیەكدا ستایشی ڕۆڵی قوباد تاڵەبانی، جێگری سەرۆكی حكومەتی هەرێمی كرد بۆ دەستبەكاربوونی كارگەی ڕیسایكلین و كۆكردنەوەی خاشاك لەلایەن كۆمپانیای شكارەوە دوای ئەوەی ڕێگای پێدان مانگێك لە ژێر چاودێری ئیدارەكاندا كار بكەن .
ئاماژەی بەوەشکرد، پڕۆژەی ڕیسایكلین لەچوارچێوەی پڕۆژەی كۆكردنەوەی خاشاكی زۆنی چەمچەماڵ و دوكان-دایە، كە كۆمپانیای شكار جێبەجێی دەكات و دەكەوێتە سنوری شارەدێی تەكیەی سەر بە چەمچەماڵ .