باری تەندروستی خامەنەئی ناجێگیرە

‌
رابەری کۆماری ئیسلامهی عەلی خامنەیی بارودۆخی تەندروستی تێکچووە و مەترسی لەسەر ژیانی هەیە، وەک کەناڵێکی ئەمەریکی لە زاری رۆژنامەنووسێکی ئاگاداری ئێرانەوە بڵاویکردۆتەوە.
  


ماڵپەڕی "الحرە"ی ئەمەریکی شەممە 5ی کانونی یەکەم لە راپۆرتێکدا بڵاویکردووەتەوە کە لە ئەکاونتی " محەمەد ئەهوازی" ڕۆژنامەنوسی ئێرانی لەتۆڕی کۆمەڵایەتی تویتەر بڵاویکردووەتەوە، ئاماژە بۆ ئەوە دەکات کە بەپێی سەرچاوەکانی هەواڵی ناوخۆیی ئێران بارودۆخی "عەلی خامنەیی" ڕێبەری باڵای شۆڕشی ئیسلامی ئێران تێکچووە".
  


کەناڵی ئەلحورە باس لەوەش دەکات کە خامنەیی دەسەڵاتەکانی نوسینگەی ڕێبەری باڵای گواستووەتەوە بۆ "موجتەبا خامنەیی" کوڕی کە سەرپەرشتی چەندین دەزگای ئەمنی و هەواڵگری دەکات لە ئێران.  


  
ئەهوازی ئەوەش دەخاتەڕوو کە تائێستا دیار نییە تێکچوونی بارودۆخی خامنەیی بەهۆی نەخۆشی شێرپەنجەی پرۆستاتەوەیە کە ماوەیەکە لەگەڵیدایە، یاخود بەهۆی نەخۆشیەکی ترەوە، لە ڕۆژی هەینییەوە بارودۆخی بەرەو خراپتربوون دەچێت و گەورە پزیشکانی ئێرانی لە نەخۆشخانەی "مسیح دانشوری" لە تاران بانگهێشکراون بۆ چاودێریکردنی باری تەندروستی. 



لەناو لوتکەی دەسەڵات لە ئێراندا شەڕ بۆ دیاریکردنی شوێنگرەوەی خامنەیی تەمەن ٨١ ساڵ بەرپا بووە، دیارترین دوو پاڵێوراویش بریتین لە "موجتەبا خامنەیی" کوڕی کە ٥١ ساڵە و خوێندنی پێشکەوتوو لە حەوزەی ئایینی لە قوم دەخوێنێت، ئەوی تریان "ئیبراهیم رەئیسی" تەمەن ٥٩ ساڵی سەرۆکی دەسەڵاتی دادوەری ئێرانە کە ساڵی ٢٠١٧ یش هەڵبژاردنی سەرۆکایەتی لە بەرژەوەندی حەسەن ڕۆحانی دۆڕاند.  
 


PM:08:48:05/12/2020








ئەستێرەکان

Spee Media