سەرۆکی تورکیا ئۆردوغان هەڕەشەی " پاککردنەوەی" خێمەی پەنابەرانی کوردانی باکور دەکات لە مەخمور و وەسفی دەکات کە بۆتە " پەناگەیەک بۆ چەکدارانی پەکەکە"و جەخت لەسەر بەرفراوانکردنی لەشکرکێشیەکەی بۆ قوڵایی ناو خاکی عێراق دەکاتەوە.
ئۆردوغان دوای کۆبوونەوەیەکی ئەنجومەنی ئاسایشی تورکیا لێدوانێکی بڵاوکردەوەو رایگەیاند " ئەو کەمپە کە ١٨٠ کم دوورە لە سنوری تورکیاوە دوو دەیەیە بۆتە شوێنی پەنابەرانی تورکیا و بۆتە " پشتێنەیەک " بۆ توندڕەوەکان و دەبێت " چارەسەری بکەین".
سەرۆکی تورکیا وتیشی " گەر نەتەوە یەکگرتووەکان ئەو کەمپە پاک نەکاتەوە، وەک ئێمە ئەندامی نەتەوە یەکگرتووەکان هەڵدەسین بەو کارە". هەروەها دەشڵێت ئەنقەرە هاوشێوەی قەندیل دەڕوانێتە ئەو کامپە و هەڕەشەیە لەسەر وڵاتەکەی.
ئۆردوغان دەپرسێت " چەند دانبەخۆمان بگرین لەبارەی ئەو کەمپەوە؟".
ئاژانسی هەواڵی رۆیتەرز بڵاویکردەوە "بەرپرسێکی عێراقی پێیراگەیاندوون کە هەفتەی رابردوو تورکیا سکاڵای گەیاندۆتە بەغدا لەسەر کەمپی مەخمور کە بۆتە شوێنی چالاکی پەکەکە دژی تورکیا".