سوپاى عێراق و هێزەکانى پێشمەرگە لە چوار لاوە
ئۆپراسیوانێكی سەربازی بەرفراوانیان لە سنووری نێوان هەردوو قەزای خورماتوو و كفری
دەستپێکرد و لەوکاتەدا، بۆمبێک بە ئۆتۆمبێلێکى
پێشمەرگەدا تەقییەوە.
ئەمڕۆ پێنج شەممە ١٢ی ئایاری ٢٠٢٢، محەمەد چەوری
جێگری فەرماندەی لیوای ١٤٤ی پێشمەرگە بە پێگەى فەرمى یەکێتى ڕاگەیاند "لە كاتی
هەڵمەتی كێوماڵكردن و ئەنجامدانی ئۆپراسیۆنە هاوبەشەكەی ئەمڕۆی ناوچەی داودە لە نزیك
گوندی پەڵكانە بۆمبێكی چێنراو بە ئۆتۆمبێلە تایبەتەكەمدا تەقییەوە و جگە لە زیانی
ماددی كە بەر ئۆتۆمبێلەكە كەوتووە هیچ زیانێكی گیانی بەدواوە نەبوو".
ئەمەش لەکاتێکدایە، ئەمڕۆ هێزێكی زۆری پێشمەرگە
لە لیواكانی ١٤٤ و١٧ و هێزەكانی ئاسایشی گەرمیان
و سوپای عیراقی لیوای ٥٢ی فیرقەی ١٤و بەرپەرچدانەوەی خێرا و لیوای ٥٢ی حەشدی شەعبی
و پۆلیسی فیدراڵی لە چوار قۆڵەوە ئۆپراسیوانێكی سەربازی بەرفراوانیان لە سنووری نێوان
هەردوو قەزای خورماتوو و كفری دەستپێکرد.
ئەنجام دانی ئۆپراسیۆنەکە بۆ كێوماڵكردنی زنجیرە
چیای غەرە و گوندەكانی پەڵكانە و شۆراو و قۆریچای كە ماوەی زیاتر لە چوار ساڵە بووەتە
مۆڵگە و حەشارگەى چەکدارانى داعش.