بەرپرسێكی كارەبا رایدەگەیەنێت، ئەمڕۆ كارەبای نزیكەی 300 هاوبەشی ماڵان بڕدراوە، چونكە سەرووی دوو ملیۆن دینار قەرزداری وەزارەتی كارەبان.
ئەمڕۆ كەمال عەساف، بەڕێوەبەری دابەشكردنی كارەبای هەولێر/2 بە (رووداو)ی راگەیاندووە، پرۆسەی بڕینی كارەبای ماڵان دەستیپێكردووە و ئەمڕۆ كارەبای نزیكەی 300 هاوبەشی ماڵان بڕدراوە و لەو ژمارەیە 260 هاوبەشیان سەردانیان كردوون كە قەرزەكانیان بۆ كراوەتە پشك و دوای ئەوە كارەبایان گەڕێندراوەتەوە.
ناوبراو ئاماژەی بەوەكرد، سەڕەرای ئەوەی دوێنێ پشوو بووە، بەڵام بەڕێوەبەرایەتیی كارەبا هەولێر بەردەوام بووە لە كاركردن و كارەبای 76 هاوبەشی كارەبای بڕیوە.
بە وتەی عەساف، ئەوان كارەبای ئەو هاونیشتمانییانە دەبڕن كە سەرووی دوو ملیۆن دینار قەرزاداری وەزارەتی كارەبان.