وەزارەتی دارایی هەرێمی کوردستان نووسراوی ئاڕاستەی سەرۆکایەتییەکان و گەنجینەکان کردووە کە لیستی مووچەی پەسەندکراوی بۆ ڕەوانە بکەن.
بەپێی نوسراوێك کە ناوەڕۆکەکەی لە میدیای پارتی و گۆڕاندا بلاوکراوەتەوە ئەمرۆ ٢٣ی کانونی دووەمی ٢٠٢٤، وەزارەتی دارایی نووسراوێکی ئاڕاستەی سەرۆکایەتییەکانی هەرێم، پەرلەمان و ئەنجومەنی وەزیران و ئەنجومەنی دادوەریی و گشت وەزارەت و دەستە و فەرمانگە نەبەستراوەکانی کردووە، داوا لێ کردوون دەکات لیستی مووچەی پەسەندکراویان بنێرن بۆ وەزارەتی دارایی.
لە نووسراوەکەدا داوا کراوە مانگانە لیستی مووچە بەپێی مووچەی بنەڕەت، جۆری دەرماڵە، لێبڕینی خانەنشین و باجی دەرامەت بە وردبینی و پەسەندکراوی بنێردرێت بۆ بەڕێوەبەرایەتیی گەنجینەکان بۆ مانگی کانوونی دووەمی ئەمساڵ.
وەزارەتی دارایی داواشی لە وەزارەت و فەرمانگە و دەستەکان کردووە، مانگانە بەر لە ١٠ی مانگ لیستی مووچەکانیان بنێرن.
تا ئێستا چارەنووسی مووچەی مانگی یەکی ئەمساڵ و مووچەی سێ مانگی کۆتایی ٢٠٢٣ نادیارە، هەرچەندە دوینێ وەزارەتی دارایی عێراق دەستی بە دابەشکردنی مووچەی مانگی یەك کرد.