سپی میدیا - هەولێر
ماڵپەڕی سەرۆکایەتی هەرێم بڵاویکردەوە، مەسعود بارزانی
ئەمڕۆ لە سەڵاحەدین لەگەڵ عرفان
ئەلحەیالی وەزیری بەرگریی عێراق و فەریق ڕوکن ئەنوەر حەمەدەمین فەرماندەی هێزی
ئاسمانی عێراق کۆبووەتەوە.
بە گوێرەی ڕاگەیەندراوەکەی
سەرۆکایەتی هەرێم "لە دیدارەكەدا کە بەڕێزان کەریم شنگالی وەزیری ناوخۆ و
وەزیری پێشمەرگە بە وەکالەت ئامادەی بوو، وەزیری بەرگریی عێراق، سەرۆك بارزانیی لە
دوایین پێشهاتە ئەمنییەكان و بارودۆخی مەیدانیی بەرەكانی ڕووبەڕووبوونەوەی
تیرۆریستانی داعش لە ئۆپەراسیۆنی ئازادکردنی موسڵ ئاگادار كردەوە. هەروەها
بارودۆخی ناوچە ئازادکراوەکانی موسڵ و ئاییندەی موسڵ خرایە بەرباس و جەختیش لە
بەرەنگاربوونەوە و لەناوبردنی تیرۆریستان و ئازادكردنی ناوچەكان كرایەوە".
سەرۆکایەتی هەرێم بڵاویشیکردووەتەوە
"هەر لە دیدارەکەدا هەماهەنگیی نێوان هێزی پێشمەرگە و سوپای عێراق لە پرۆسەی
ئازادکردنی موسڵدا بەرز نرخێندرا و جەخت لەسەر بەردەوامیی ئەو هەماهەنگییە کرایەوە".