لە ڕێگای پەیوەندی تەلەفونییەوە بە بارزانییەوە، وەزیری دەرەوەی ئەمەریکا رێکس تیلەرسن، ناڕەزایەتی وڵاتەکەی دژی ریفراندۆم بەڕاشکاوانە بەبارزانی رادەگەیەنێت.
هەرچەندە ماڵپەڕی سەرۆکایەتی هەرێم و ماڵپەڕی حکومەت هیچ زانیارییەکیان لەسەر ئەو پەیوەندە تەلەفونییەی نێوان وەزیری دەرەوەی ئەمەریکا بەجیا لەگەڵ عەبادی و بارزانی بڵاونەکردۆتەوە، بەڵام
بەپێی هەواڵیکی کۆنسوڵخانەی ئەمریکا لە هەولێر، رۆژی هەینی رێکس تیلەرسن لە پەیوەندییەکی تەلەفۆنیدا وەزیری دەرەوەی ئەمریکا ناڕەزایەتی ئەمریکای بەرامبەر رئیفراندۆم بۆ سەربەخۆیی کوردستان گەیاندووەتە بارزانی و جەختی لە پشتگیری بەردەوامی ویلایەتە یەکگرتووەکانی ئەمریکا کردووەتەوە ، بۆ عێراقێکی دیموکراتیی فیدراڵیی یەکگرتوو.
لەو پەیوەندیە تەلەفونییەدا وەزیری دەرەوەی ئەمەریکا وەسفی رۆڵی پێشمەرگەی کردووە لە بەرەنگاربوونەوەی چەکدارانی داعشدا.
بەپێی هەواڵەکەی کۆنسوڵخانەی ئەمریکا لە هەولێر، وەزیری دەرەوەی ئەمریکا داوای لە بارزانی و عەبادی کردووە دەرگای گفتوگۆ لەنێوانیاندا بکەنەوە بۆ چارەسەریی هەموو ئەو کێشانەی لەنێوان هەولێر و بەغدا هەیە.
لە پەیوەندییە تەلەفۆنییەکەیدا لەگەڵ حەیدەر عەبادی، سەرۆکوەزیرانی عێراق ، کە ئەویش رۆژی هەینی 4-8-2017 ئەنجامدراوە ، تیلەرسن پشتگیریی وڵاتەکەی لە گەلی عێراق و شەڕی هاوبەشی هەردوولا لە دژی داعش دووپاتکردووتەوە و رایگەیاندووە "ویلایەتە یەکگرتووەکانی ئەمریکا و عێراق بەتەواوەتی پابەندن بە شەراکەتی گشتگیری نێوانیان کە لەسەر بنەمای رێزگرتن لە یەکتر خۆی دەبینێتەوە و هەروەها بناغەکەی بریتییە لە رێککەوتنی ستراتیژیی چوارچێوەی کاری نێوان عێراق و ویلایەتە یەکگرتووەکانی ئەمریکا، کە لەم چوارچێوەیەدا دەستەبەری هاوکاریی سیاسیی و ئابووریی و کولتووریی و ئاسایش کراوە".
وەزیری دەرەوەی ئەمریکا هەروەها پشتگیریی ویلایەتە یەکگرتووەکانی ئەمریکای بۆ گەلی عێراق و شەڕی هاوبەشی هەردوولا دژی داعش دووپاتکردووەتەوە و جەختیکردووەتەوە لە "پێویستیی بەردەوامیی هاوکاریی بەهێزی نێوان بەغدا و هەولێر ، لە شەڕی داهاتووی نزیکیان لە دژی داعش لە تەلەعفەر و حەویجە".