ئەمڕۆ یەکشەممە 8ی تشرینی یەکەم، هومام حەمودی لە بەیاننامەیەکدا سەبارەت بە سەردانەکەی سەلیم جبوری بۆ لای بارزانی ڕایگەیاندووە "ئەو سەردانە پێچەوانەی ئەو ئاڕاستەیە کە پەرلەمان کاری بۆ کردووە و وتیشی کە هۆشدارییان داوەتێ سەردانەکە نەکات".

ئاماژەی بەوەشداوە سەردانەکە هیچ لە هەڵوێستی بارزانی ناگۆڕێت و چارەسەرکردنی کێشەکانیش سەرەتا بە ڕەتکردنەوەی ئەنجامی ڕیفراندۆم و پابەندبوون بە دەستور و بڕیارەکانی دادگای ناوەندی دەبێت.

ئەوەش لەکاتێکدایە ئەمڕۆ پاش کۆبوونەوەی لەگەڵ بارزانی، ئوسامە نوجەیفی جێگری سەرۆک کۆماری عێراق ڕایگەیاند "لە داهاتوویەکى نزیکدا دەرئەنجامەکانى دەستپێشخەرییەى لەگەڵ حەیدەر عەبادی سەرۆک وەزیرانى عێراق و سەرکردەى لایەنە سیاسییەکانى تر تاوتوێ دەکات".

ئەوەشی وتووە "لە کۆبوونەوەکانمدا لەگەڵ هەر یەک لە بارزانى و ئەردۆغاندا جەختمان لەسەر یەکپارچەى خاکى عێراق و ڕێزگرتنى دەستور کردووەتەوە، باسمان لەوە کردووە گرنگە بە گفتوگۆ سەرجەم کێشەکان چارەسەر بکرێت".

نوجەیفی ئەوەشی وتووە "کێشەى ڕێفراندۆم و دەرهاویشتە خراپەکانى دەرئەنجامى چەند سیاسەتێکى هەڵەبووە و پێوستە ڕێگەچارەى مامناوەند لە نێوان هەردوولا بدۆزرێتەوە".

ئەمڕۆ سەلیم جبوری سەرۆکى پەرلەمانی عێراق سەبارەت بە کەمکردنەوەى گرژییەکانی نێوان هەرێم و ناوەند سەردانى هەولێری کرد و لەگەڵ بارزانیدا کۆبووەوە.

هاوکات هێمن هەورامی ئەندامی سەرکردایەتی پارتی لە تۆڕی کۆمەڵایەتی تویتەر لەتویتێکدا لەسەر کۆبوونەوەی نێوان بارزانی و سەلیم جبوری نوسیوویەتی "سەرۆک بارزانی بە روونی بە سەلیم جبوری راگەیاند کە کورستان ئامادەیە بۆ گفتوگۆی هەمەلایەنە بە ئەجێندایەکی کراوە لە ماوەیەکی دیاریکراودالەگەل بەغدا و دەمانەویت بە گفتوگۆ و پشوو درێژی بگەینە ریککەوتن لەسەر قۆناغی پاش ریفراندۆم. هیچ کەس بیر لە هەلوەشانەوەی ئەنجامی ریفراندۆم نەکات چونکە ئەوە بریاری گەلە و هیچ کەس و هێز و لایەنیک ناتوانیت بریاری وابدات".

هاوکات سەرۆکایەتی هەرێم لە ڕاگەیەندراوێکیدا ئاماژەی بۆ ئەوە کردوە کە لە کۆبوونەوەکەدا "وێڕای دووپاتكردنەوەی پێویستی پاراستنی سەقامگیری و ئاساییش و دووركەوتنەوە لە گرژی، جەخت لەسەر هێوركردنەوەی بارودۆخی سیاسی و پشتبەستن بە پڕەنسیپی گفتوگۆ بە ئەجیندای كراوە و بەشداریی هەمەلایەنە بۆ گەییشتن بە چارەسەركردنی كێشەكانی نێوان هەولێر و بەغدا كرایەوە".