مەعن سەعدی، كە فەرماندەی فیرقەی دووی ئاڵتونی دژە تیرۆری عێراقە و لە ئێستادا دۆسیەی ئەمنی شاری كەركوكی گرتۆتە دەست، یەكێكە لە بەرپرسانی بەعس و سوێندی شەرەفی بۆ سەرۆكی ڕژێمی بەعس خواردووە.
بەگوێرەی ڤیدیۆیەك كە مێژووەكەی بۆ سەردەمی بەعس دەگەڕێتەوە و كەناڵی كوردستان24 كردویەتی بەكوردی سەعدی لەكاتی وەرگرتنی پۆستی سەرۆكی یەكەی دووی ئۆپەراسیۆنە تایبەتەكانی ڕژێمی بەعس سوێندی شەرەف بۆ سەدام حسێن، سەرۆكی ڕژێمی بەعس دەخوات كە بەوەفا بێت بۆی و خۆی و بنەماڵەكەی ببێت بە یەكێك لە شمشێرەكانی كەمەری سەدام وەك خۆی دەڵێت "بۆ پاراستنی عێراق".
مەعن یەكێك بووە لە ئەفسەرەكانی بەعس و چەندین تاوانی دژ بە كورد و نەتەوەكانی دیكە ئەنجامداوە و بەو هۆیەوە لەلایەن سەدام حسێنەوە چوار میدالیای ئازایەتی پێبەخشراوە.
لەدوای ڕووداوەكەی 16ی مانگیشەوە ناوبراو كە فەرماندەی فیرقەی دووی ئاڵتونی دژە تیرۆری عێراقە دۆسیەی ئەمنی شاری كەركوكی خراوەتە ئەستۆ.